Վ.ՊՈՂՈՍՅԱՆ
Ռուսաստանը պետք է հարգի ԵՄ արեւելյան հարեւանների` ԵՄ-ի հետ ասոցիացման համաձայնագրերում ներգրավվելու ընտրության իրավունքը: Այսպիսի հայտարարությամբ բանաձեւ են ընդունել Եվրոպական խորհրդարանի պատգամավորները երեկվա իրենց նիստում:
Ըստ ԵԽ պաշտոնական կայքէջում տեղադրված մամուլի հաղորդագրությանՙ խորհրդարանականները մասնավորապես շեշտել են, որ Ռուսաստանը պետք է ձեռնպահ մնա ճնշումներ գործադրելուց, ինչպիսիք էին առեւտրային պատժամիջոցները Ուկրաինայի եւ Մոլդովայի դեմ ու սպառնալիքները Հայաստանին, որոնք տարհամոզում են նրանց ստորագրել կամ նախաստորագրել փաստաթղթեր ԵՄ-ի հետ նոյեմբերին Վիլնյուսում կայանալիք Արեւելյան գործընկերության գագաթաժողովում:
ԵԽ պատգամավորները բանաձեւում դատապարտել են Ռուսաստանի անընդունելի ճնշումները արեւելյան գործընկերների վրա վիլնյուսյան գագաթաժողովին ընդառաջ: Նրանք կոչ են արել հարգել այդ երկրների ինքնիշխան իրավունքը եւ չմիջամտել նրանց ներքին գործերին, ինչը միջազգային իրավունքի պահանջ է: Արեւելյան գործընկերության երկրները, ըստ պատգամավորների, իրավունք ունեն «հարաբերություններ հիմնելու իրենց ընտրությամբ գործընկերների հետ»:
Բանաձեւը մերժում է այն գաղափարը, թե ԵՄ-ի եւ Ռուսաստանի հարաբերությունները Արեւելյան գորընկերության երկրների հետ կարելի է որակել որպես «զրո արդյունքով խաղ»: «Տարածաշրջանի սառեցված հակամարտություններն իր աշխարհաքաղաքական եւ տնտեսական շահերում օգտագործելու փոխարեն Ռուսաստանը պետք է համագործակցի եւ կառուցողական մոտենա տարածաշրջանի տնտեսական ու քաղաքական կայունությանը», ասվում է բանաձեւում:
ԵԽ անդամները արեւելյան գործընկերներին խրախուսել են շարունակել պատրաստությունները վիլնյուսյան գագաթաժողովին ու «չհանձնվել Ռուսաստանի ճնշմանը»: Եվրոպական խորհրդարանը վերահաստատել է իր ամուր աջակցությունը նախաստորագրելու կամ ստորագրելու համաձայնագրեր արեւելյան այն գործընկեր երկրների հետ, որոնք «պատրաստ են եւ ցանկանում են դա անել»:
Նույն բանաձեւում նաեւ Եվրոմիությանն է կոչ արվում պատասխանատվություն ստանձնել պաշտպանելու Արեւելյան գործընկերության երկրներին, որոնք ենթարկվում են Ռուսաստանի «ակնհայտ, մտահոգիչ եւ ահագնացող ճնշումներին»: Խորհրդարանականները դիմել են Եվրոպական հանձնաժողովին եւ Եվրոպական խորհրդին` «կոնկրետ ու արդյունավետ միջոցներ» ձեռնարկելու հաջակցություն գործընկեր երկրների` իրենց եվրոպական ձգտումներում եւ ընտրության մեջ:
Բանաձեւի հիմքում ընկած են այն մոտեցումները, որ վերջին շրջանում Ռուսաստանը արգելափակել է ներմուծումը ուկրաինական զգալի ապրանքների համար, արգելել մոլդովական գինու եւ սպիրտի մուտքը, Հայաստանն էլ հայտարարել է Մաքսային միությանը միանալու մասին, ինչն անհամատեղելի է Խոր եւ համապարփակ ազատ առեւտրի համաձայնագրի հետ: Հայաստանի հետ իրավիճակն էլ, ըստ խորհդրարանականների, Ռուսաստանի կողմից անվտանգության հարցերում սպառնալիքների արդյունք էր:
