Պուտինի հոդվածը «Նյու Յորք թայմսում»
Սեպտեմբերի 12-ին «Նյու Յորք թայմս» թերթը հրապարակել է ՌԴ նախագահ Վլադիմիր Պուտինի «Զգուշության կոչ Ռուսաստանից» հոդվածը, որը նվիրված է Սիրիայի իրադարձություններին:
Պուտինը մասնավորապես հայտարարում է, որ Սիրիայի հակամարտության մեջ Մոսկվան ոչ թե պաշտպանում է Բաշար Ասադի վարչակարգը, այլ հանդես է գալիս միջազգային իրավունքի նորմերի պահպանման օգտին:
Նախագահի խոսքերովՙ Ռուսաստանը հետեւողականորեն պաշտպանում է խաղաղ երկխոսության գաղափարը, որպեսզի սիրիացիներն իրենք մշակեն երկրի ապագա զարգացման փոխզիջողական մոդելը:
Ինտերֆաքս գործակալությունը մեջբերում է Պուտինի այն խոսքերը, որ վերջին օրերին ի հայտ են եկել հակասիրիական ռազմական գործողությունը շրջանցելու նոր հնարավորություններ: «Ռուսաստանը, միջազգային ընկերակցության բոլոր անդամները պարտավոր են օգտվել քիմիական զինանոցը միջազգային վերահսկողությանը հանձնելու եւ հետագայում ոչնչացնելու Սիրիայի պատրաստակամությունից», ընդգծում է Պուտինը:
Նա մտահոգություն է հայտնում, որ օտար պետությունների ներքին հակամարտություններին ռազմական ուժով միջամտելը սովորական երեւույթ է դարձել ԱՄՆ-ի համար: «Համապատասխանո՞ւմ է դա արդյոք Ամերիկայի երկարաժամկետ շահերին: Ես դրան կասկածում եմ», գրում է ՌԴ նախագահը, ավելացնելով, որ աշխարհում միլիոնավոր մարդիկ սկսել են ԱՄՆ-ը համարել ոչ թե ժողովրդավարության տիպար, այլ բիրտ ուժի վրա հենվող եւ «Մեզ հետ կամ մեր դեմ» կարգախոսով կոալիցիաներ կազմող երկիր:
Միեւնույն ժամանակ Պուտինը ողջունում է Սիրիայի հարցում Ռուսաստանի հետ երկխոսությունը շարունակելու Օբամայի ցանկությունը: «Եթե կարողանանք խուսափել Սիրիայի դեմ ուժի կիրառումից, դա կբարելավի միջազգային մթնոլորտը եւ կամրապնդի փոխադարձ վստահությունը: Դա կդառնա մեր ընդհանուր հաջողությունը եւ համագործակցության նոր դռներ կբացի», նշում է Պուտինը:
Ինչ վերաբերում է օգոստոսի 21-ի քիմիական գրոհին, նա գրում է, որ «բոլոր հիմքերը կան կարծելու, որ զենքը կիրառել է ոչ թե սիրիական բանակը, այլ ընդդիմությունը, որպեսզի հրահրի իր արտասահմանյան հզոր հովանավորների միջամտությունը»:
Պուտինը զգուշացնում է, որ գրոհայինները պատրաստում են եւս մեկ հարձակում, այս անգամՙ Իսրայելի դեմ:
Հոդվածագիրը ընդգծում է, որ Սիրիայում պատերազմ է մղվում ոչ թե հանուն ժողովրդավարության, այլ հանուն իշխանության: «Այսօր բազմադավանանք երկրում առկա է կառավարության եւ ընդդիմության դիմակայություն: Ժողովրդավարության ջատագովները Սիրիայում այնքան էլ շատ չեն, մինչդեռ ամեն կարգի ծայրահեղականները եւ «Ալ Ղաիդայի» անդամները ընդդիմության շարքերում շատ-շատ են», նշում է նախագահը:
Նա հիշեցնում է, որ ԱՄՆ պետդեպարտամենտը եւս ահաբեկչական կազմակերպություններ է համարում սիրիացի ընդդիմադիրների ճանբարում կռվող «Ջաբհաթ ան Նուսրա» եւ «Իրաքի եւ Լեւանտի իսլամական պետություն» խմբավորումները:
