ԱՄՆ դեսպանատան տարածած երեկվա հայտարարությունը քաղաքացիական ակտիվիստների նկատմամբ հարձակումների վերաբերյալ ժամանակային առումով կարծես մի փոքր ուշացել է ու զարմանալիորեն Մաքսային միությանը Հայաստանի անդամակցության ցանկության բարձրաձայնմանն է հաջորդել: Միգուցե չարժե այդպիսի առնչություն փնտրել այս երկու իրողությունների միջեւ, ու սա պարզ համընկնում է: Մի խոսքով` երեկ ԱՄՆ դեսպանատունը դատապարտել է քաղաքացիական ակտիվիստների, այդ թվումՙ ԱՄՆ քաղաքացու նկատմամբ հարձակումները, որոնք սկիզբ են առել ս.թ. օգոստոսի 22-ից: «Վերջին հարձակման ժամանակ, սեպտեմբերի 5-ին երկու քաղաքացի դաժան ծեծի են ենթարկվել, որի հետեւանքով տեղափոխվել են հիվանդանոց, որտեղ նրանցից մեկին վիրահատել են: Հարձակումներին զուգահեռ եղել են բազմաթիվ հաղորդումներ, որ ակտիվիստներին հետեւում են, սպառնում եւ ահաբեկում:
Կոչ ենք անում ՀՀ կառավարությանը շուտափույթ գործողություններ ձեռնարկելՙ դատապարտել այդ հարձակումները, անցկացնել քննություններ ու պատժել մեղավորներին: Պետությունը պետք է երաշխավորի, որ քաղաքացիները հավաքների, արտահայտվելու ու խոսքի ազատության իրենց հիմնարար իրավունքներից կարողանան օգտվել առանց հաշվեհարդարից վախի», ասված է հայտարարության մեջ:
