Ժամանակ առաջ մենք անդրադարձել էինք Մեհրիբան Ալիեւայի «անհետանալու» խնդրին: Բանն այն է, որ Իլհամ Ալիեւը շարունակում է իր «թանկագին կեսին» հեռու պահել նախընտրական քարոզչությունից: Ադրբեջանի առաջին տիկնոջ անունը ջնջված է թե՛ իշխանական, թե՛ ընդդիմադիր մամուլից, էլեկտրոնային լրատվամիջոցներից, մի բան, որ ադրբեջանական քաղաքական ավանդույթների շրջանակներում չի տեղավորվում:
Սակայն եթե ուշադրություն դարձնենք հարեւան երկրից ստացվող տեղեկատվությանը, նկատելի կդառնա, որ իշխող վարչախումբն իրոք լուրջ կասկածներ ունի առնվազն Մեհրիբան Ալիեւայի մերձավոր հարազատների հանդեպ: Երեկ, մասնավորապես, virtualaz.org-ը Բաքվում գումարված Եվրոպա-Ադրբեջան ներդրումային խորհրդաժողովի մասին տեղեկատվությունը վերնագրել էր այսպես. «Հաֆիզ Փաշաեւի ակադեմիայում Եվրոհանձնաժողովի ներկայացուցիչը քննադատել է Ադրբեջանին»:
Խոսքն Ադրբեջանի ԱԳՆ դիվանագիտական ակադեմիայի մասին է, որի տնօրեն Հաֆիզ Փաշաեւը Մեհրիբան Ալիեւայի հորեղբայրն է: Վերջինս ոչ հեռավոր անցյալում զբաղեցնում էր ԱԳ նախարարի առաջին տեղակալի պաշտոնը, ավելի վաղ Միացյալ Նահանգներում Ադրբեջանի դեսպանն է եղել: Ակնհայտ է, որ «Հաֆիզ Փաշաեի ակադեմիայում Եվրոհանձնաժողովի նախագահը քննադատել է Ադրբեջանին» վերնագիրը պատահաբար չի ընտրվել: Այդ կերպ լրատվամիջոցը ցանկացել է «ինչ-որ բան ասել»:
Իսկ ի՞նչ է ասել Եվրոհանձնաժողովի ներկայացուցիչը: Ադրբեջանում ԵՄ առաքելության ղեկավար Թորաֆ Պիլյան ընդգծել է, որ «տնտեսությունը (Ադրբեջանի) կախված է նավթային գործոնից, թույլ մրցունակ է եւ կոռումպացված»: Խորհրդաժողովի մյուս մասնակիցներն, ընդհակառակը, ըստ նաեւ «Թուրան» գործակալության, համարել են, որ Ադրբեջանի «վերջին քսանամյակի քաղաքական կայունությունը նրա տնտեսական զարգացման գրավականն է»:
Շեշտվում է նաեւ, որ ոչ ոք չի անդրադարձել Ադրբեջանում ժողովրդավարության եւ մարդու իրավունքների հարցերին` «գերադասելով տնտեսական նպատակահարմարությունը»: Բայց դա բոլորովին այլ թեմա է: Մեզ ավելի կարեւոր է թվում, թե ինչո՞ւ հատկապես ընդգծվել է, որ Եվրոհանձնաժողովի ներկայացուցիչն Ադրբեջանին քննադատել է «Հաֆիզ Փաշաեւի ակադեմիայում»:
Արդյոք այդպիսով չի՞ ակնարկվում, որ ԱԳՆ դիվանագիտական ակադեմիայի ռեկտորը որոշակիորեն «թերացել է իր պարտականություններում»: Այսինքն, նա կարող էր միջոցառումն այնպես կազմակերպել, որ ընդհանրապես դրական համայնապատկերը «չխաթարվեր» տիկին Պիլյայի քննադատական դիտողություններով: Չէ՞ որ ակնհայտ է, որ ներդրումային հարցերով խորհրդաժողովը կազմակերպվել է նախընտրական քարոզչության նկատառումներով: Իշխող վարչախումբը դրանով փորձել է տպավորություն ստեղծել, թե «որքան կարեւոր գործընկեր է Ադրբեջանը Եվրոմիության համար», որ իր եվրոպացի գործընկերները «չափազանց բարձր են գնահատում տիրող քաղաքական կայունությունը եւ տնտեսական առաջընթացը»:
Իսկ ստացվել է այնպես, որ իրավիճակին ավելի քաջատեղյակ` Ադրբեջանում ԵՄ առաքելության ղեկավարը «փչացրել է» Իլհամ Ալիեւը տրամադրությունը: Ընդ որում, դա տեղի է ունեցել ոչ թե ինչ-որ ընդդիմադիր կուսակցության գրասենյակում, այլ` Ադրբեջանի ԱԳՆ դիվանագիտական ակադեմիայում, որի ռեկտորը Մեհրիբան Ալիեւի հորեղբայր Հաֆիզ Փաշաեւն է: Սա է վերոհիշյալ տեղեկատվության թողած տպավորությունը:
Իսկ եթե այդպես է, ապա չի՞ նշանակում, որ Իլհամ Ալիեւն իրոք Փաշաեւներին կասկածում է իր դեմ «նյութված դավադրությանն» առնվազն համակրելու մեջ: Ամենայն հավանականությամբ, նախագահի պաշտոնում «վերընտրվելուց» հետո Իլհամ Ալիեւը ձեռնամուխ է լինելու մերձավոր շրջապատում վերադասավորումներ անելու քայլերի: Եվ բացառված չէ, որ Փաշաեւների ընտանիքն ունենա կորուստներ: Մանավանդ որ ե՛ւ Հաֆիզ Փաշաեւը, ե՛ւ Արիֆ Փաշաեւը` Մեհրիբան Ալիեւայի հայրը, վաղուց հատել են թոշակային տարիքի սահմանը, եւ նրանց կարելի է անաղմուկ ուղարկել «վաստակած հանգստի»: Բայց դրանով կավարտվի՞, թե՞ կբացահայտվի իշխող ընտանիքի ներքին հակասությունների գաղտնիքը` խնդիրը դա է:
