Վ. Պ.
Եվրոպական ժողովրդական կուսակցության փոխնախագահ Յացեկ Վոլսկին հայտարարել է, որ Եվրոմիության արեւելյան գործընկերների վրա Ռուսաստանի վերջին շրջանի ճնշումները ակնհայտ փորձ են հարցականի տակ դնելու Արեւելյան գործընկերության նախագիծը:
Ուկրաինական լրատվամիջոցների տեղեկացմամբՙ Վոլսկին հայտարարել է. «Վերջին շրջանում Ռուսաստանի ճնշումները եւ դրա արդյունքները Արեւելյան հարեւանության առումով` Հայաստանի հայտարարությունը Եվրասիական միության միանալու մասին, Վրաստանի վարչապետի հայտարարությունը նման տարբերակի դիտարկման մասին, առեւտրային պատերազմը Ուկրաինայի հետ եւ բազմակի սպառնալիքները Մոլդովայի հասցեին ակնհայտ փորձեր են հարցականի տակ դնելու Արեւելյան գործընկերության նախագիծը»:
Վոլսկին ուրախությամբ է նշել, որ Եվրոխորհրդարանը հստակ դիրքորոշում ունի այդ հարցում: «Եվրոմիությունը պարտավոր է Ռուսաստանի` Եվրոմիության հետ ասոցիացումը կասեցնելու անընդունելի գործողություններից պաշտպանել այն երկրներին, որոնք իր արեւելյան գործընկերներն են», ասել է ԵԺԿ փոխնախագահը:
Տեղեկացնենք, որ արդեն մի քանի օրից` հաջորդ շաբաթասկզբին Եվրոխորհրդարանը բանաձեւի նախագիծ կքննարկի, որով անդամ երկրներին եւս մեկ անգամ կհիշեցնեն, որ Արեւելյան գործընկերության երկրները, Հելսինկյան եզրափակիչ ակտի համաձայն, լիիրավ ինքնիշխան իրավունք եւ ազատություն ունեն հարաբերություններ հաստատելու գործընկեր այլ երկրների հետ հավասար մակարդակում:
Թե այս վերջինը ինչ է նշանակում Եվրոխորհրդարանի պարագայում եւ վերջնական ինչ ձեւակերպումներ կունենա` կտեսնենք հաջորդ շաբաթ: Իսկ մինչ այդ մնում է հուսալ, որ շատ հարցերում դիլետանտ եվրոխորհրդարանականները այս հարցում առավել տեղեկացված ու ըմբռնումով մոտեցում կցուցաբերեն:
