ԱՄՆ-ի նախագահ Բարաք Օբաման պաշտպանության նախարարությանը կարգադրել է ընդլայնել սիրիական հնարավոր թիրախների ցանկը, որոնք կարող են հարձակման ենթարկվել Բաշար Ասադի վարչակարգի դեմ ռազմական գործողության ժամանակ, հաղորդում է «Նյու Յորք թայմս» թերթը:
Նշվում է, որ տվյալ որոշումն ընդունվել է ստացված հետախուզական տվյալների կապակցությամբ, որոնց համաձայն, ամերիկացիների հարձակումից առաջ Սիրիայի ղեկավարությունը վերաբաշխում է զորքերը, այդ թվումՙ քիմիական զենքի կիրառման համար թերեւս պատասխանատու ստորաբաժանումները:
Հոդվածագիրներ Դեւիդ Զանգերի եւ Էրիկ Շմիտտի տվյալներով, գործողության գլխավոր նպատակն է Ասադի զորքերին զրկել ապագայում քիմիական զենք կիրառելու հնարավորությունից կամ գոնե թուլացնել նման զենքի օգտագործման ներուժը: «Նյու Յորք թայմսը» հաստատում է, որ Պենտագոնը չի ծրագրում հարվածել քիմիական զենքի պահեստներին, բայց ԱՄՆ-ի բանակը կհարվածի սիրիական բանակի այն ստորաբաժանումներին, որոնք ի վիճակի են նման զենք օգտագործել: Գրոհների թիրախ կդառնան Ասադի բանակի հրթիռային ուժերը եւ հակաօդային պաշտպանության զորամասերը:
Թիրախների ցանկի ընդլայնումը նշանակում է, որ ամերիկյան բանակը պատրաստ է 60+30 օրվա ընթացքում Սիրիայի տարածքում հարվածել 50-ից ավելի ռազմական եւ ռազմավարական օբյեկտների: Ենթադրվում է, որ գործողությանը կմասնակցեն ԱՄՆ-ի եւ Ֆրանսիայի ռազմաօդային ուժերը, նշվում է հրապարակման մեջ: Չի բացառվում ՆԱՏՕ-ի նաեւ այլ ուժերի ներգրավումը:
Ամենայն հավանականությամբ, գործողությանը կմասնակցեն ամերիկյան օդուժի ոչ միայն կործանիչներ, այլեւ ռմբակոծիչներ, ինչպես նաեւ ռազմածովային ուժեր:
