Պաշտպանության նախարար Սեյրան Օհանյանը երեկ հաստատել է վարչապետ Տիգրան Սարգսյանի հայտարարությունը, որ Հայաստանը վերջին 3 տարիներին սպառազինության աննախադեպ գնումներ է իրականացրել:
«Վերջին երեք տարիներին ավելի մեծ թվով զենք ենք ձեռք բերել, քան նախորդ տարիներին: Վարչապետի խոսքերը ճիշտ են, եւ մենք շարունակելու ենք այդ գործընթացը», հայտարարել է Սեյրան Օհանյանը ՙ նշելով, որ եթե 2000-2007 թվականներին Հայաստանի զինված ուժերը զբաղվել են սպառազինության նվազագույն պահուստների ստեղծմամբ, ապա 2007-ից հետո ձեռք են բերվել այնպիսի սպառազինություններ, որոնք թույլ կտան հակազդել Ադրբեջանի առավելություններին:
«Ձեռք ենք բերել զենիթահրթիռային համակարգեր, հեռավոր նշանառման եւ ճշգրիտ սպառազինություն, որը մեզ հնարավորություն է տալիս հարվածներ հասցնելու հակառակորդի կարեւոր օբյեկտներին ոչ միայն օպերատիվ խորության վրա, այլեւ ավելի հեռուՙ հետ պահելով նրան Հայաստանի նկատմամբ ագրեսիվ գործողություններից»:
Նախարարի գնահատմամբՙ վերջին շրջանում հակառակորդի ակտիվացումը, հատկապես դիպուկահարների գործողությունները կապված են Ադրբեջանում մեկնարկող նախագահական ընտրությունների հետ:
«Հակառակորդի ակտիվացումները, դիպուկահարների գործունեությունը միշտ էլ եղել են, սակայն դրանց միշտ տրվում է պատասխան: Ընդ որումՙ պատասխաններն այնպիսին են լինում, որ հակառակորդը զգում է, որ պատիժն ինքը ստացել է խախտման համար», ասաց Օհանյանըՙ հավաստիացնելով, որ Ադրբեջանում կորուստներն ավելի շատ են լինում, քան ներկայացվում է:
