Ավստրալահայ երիտասարդ դերասան, կինոռեժիսոր Տրիստան Արդինը Ավստրալիայում մեկնարկ է տվել իր նոր`«Լooking Out» («Եղի՛ր ուշադիր») կինոնախագծին: Ինչպես հաղորդում է «Արմենպրես»-ը` վկայակոչելով Armenia Online պարբերականը, ֆիլմի գլխավոր ասելիքը սոցիալական զգայուն հարցն է` ի՞նչ է իրականում տեղի ունենում անչափահասներով զբաղվող արդարադատության համակարգի փակ դռների հետեւում:
«Լooking Out» դրաման բացահայտում է մի նոր աշխարհ, որի մասին քչերը գիտեն: Գլխավոր հերոսը երիտասարդ պատանի է, ով ազատազրկության մեջ է գտնվում անչափահասների գաղութում: Նա ստիպված է դիմակայել սեփական անցյալին: Արդյոք նրան կհաջողվի՞ փոխել իրեն շրջապատող ապականված միջավայրը, թե՞ ազատազրկության դաժանությունն ու դժվարությունները կկործանեն նրան:
Տրիստան Արդինը սովորել է մեծ ճանաչում վայելող Դրամատիկական արվեստի ազգային ինստիտուտում եւ շուրջ երեք տարի մասնավոր դասեր է վերցրել մեծանուն կատարող Էն Սվոնից: Իսկ վերջին տարին դերասանական արվեստի դասերի է հաճախել Նյու Յորքում:
