Մաշտոցի պողոտան երեկ վերածվել էր բախումների եւ էժանագին շոուի թատերաբեմի: Կեսօրին «Փակ շուկայի» տարածքում հավաքվել էին Սամվել Ալեքսանյանին (Լֆիկ Սամո) պատկանող ձեռնարկությունների աշխատակիցներըՙ ի պաշտպանություն Ալեքսանյանի իրավունքների: Նրանք խոստովանեցին, որ Լֆիկին պատկանող ռեստորանների եւ «Երեւան-սիթի» սուպերմարկետների աշխատակցուհիներն են: Նրանք հայտարարում էին, թե արդար չեն համարում, որ հիմա պայքար է մղվում նոր աշխատատեղերի դեմ: Իրականում, սակայն, պայքարը մղվում է ոչ թե նոր աշխատատեղերի դեմ կամ որ շուկան չշահագործվի, այլՙ հուշարձան-կառույցի աղճատման եւ այլանդակման դեմ: Սակայն այս պարզ խնդիրը անհնար էր բացատրել եւ հասկացնել աշխատակցուհիներին, այնպես, ինչպես իրենց գործատուին: «Բացում, բացում», «Մենք կողմ ենք աշխատատեղերի բացմանը», «Դավաճաններ, ժողովրդին պառակտում եք» եւ նմանատիպ վանկարկումներով նրանք բղավում էին, որ Սամվել Ալեքսանյանը բարերար է: «Չեն էլ ամաչում, եկել են էդ սուրբ մարդու դեմն են կանգնում», բղավում էին կանայք ու սպասում այն ակտիվիստներին, ովքեր պայքարում են հուշարձանի պահպանման համար:
Նախատեսված ժամին ակտիվիստները չեկան. նրանք դա բացատրեցին նրանով, որ չեն ցանկանում հասարակության երկու հատվածերի միջեւ պառակտում մտցնել: Եթե մյուս կողմի ակտիվիստներն էլ գային տարածք, ապա դժվար չէ կռահել, թե ինչ տեղի կունենա: Ամենազավեշտալին այն էր, որ «Սիթիի» աշխատակցուհի կանայք տարածք էին եկել հովանոցներով, տարածքից մի փոքր հեռու կանգնած էին բազմաթիվ տղաներ, ովքեր ժամանակ առ ժամանակ զանգահարում ու վերադասներին տեղակացնում էին, թե աշխատակցուհիներն իրենց ինչպես են պահել: Ալեքսանյանի շուրջ 1000 աշխատակիցների ցույցերի հետեւանքով Մաշտոցի պողոտայի երթեւեկությունը հայտնվել էր կաթվածահար վիճակում:
Տարածքում բազմաթիվ ոստիկաններ չէին կարողանում զսպել բողոքի ակցիայի մասնակիցներին, ովքեր դուրս էին փողոց եւ անդադար բղավում էինՙ Ալեքսանյան, Ալեքսանյան: «Ալեքսանյան» շոուն տեւեց մինչեւ ժամը 15:30: Ժամը 1-ից արեւի տակ գոռգոռացող եւ Լֆիկին բարերար հռչակած տիկնանց շշերով խմելու ջուր բերեցին: Սակայն միայն ջրի առկայությունը շատերին հիասթափեցրեց. ակտիվիստ տիկնանցից շատերը նաեւ քաղցած էին, բա բրդուճ չի՞ լինելու, ճշտում էին նրանք իրենց ջուր բաժանող տղաներից: Բրդուճը չեկավ:
Շուկայի պահպանման համար պայքարող ակտիվիստները Մաշտոցի պուրակում էին: «Ալեքսանյանական խմբից չենք վախենում», սակայն հասարակության մեջ պառակտում մտցնել չեն ցանկանում, հետեւաբար հեռվից կհետեւեն շուկայում շարունակվող բողոքի ակցիային եւ միայն շինարարության շարունակումից հետո կրկին կգնան «Փակ շուկա»:
Երեկ «Փակ շուկայի» վերաբերյալ հայտարարություն է տարածել Մարդու իրավունքների պաշտպանի գրասենյակը: Անդրեասյանը մեջբերել է մշակույթի, քաղաքաշինության եւ Երեւանի քաղաքապետարանի ներկայացուցիչների հայտարարություններըՙ հավելելով, որ շինությունն ապօրինի է: Կառույցի գլխավոր պատասխանատու Երեւանի քաղաքապետարանը հայտարարել է, որ «Երեւանի թիվ 1 շուկա» ՍՊԸ-ի տնօրենը տեղեկացվել է Մաշտոցի պողոտայի 5 հասցեում գտնվող շուկայի տարածքում ապօրինությունները վերացնելու եւ դրանից հետո միայն քաղաքաշինական փաստաթղթերին համապատասխան կառուցապատումը շարունակելու անհրաժեշտության մասին: Սակայն, ինչպես տեսնում ենք, քաղաքապետարանի պահանջը մինչ այսօր ոչ միայն չի կատարվել, այլեւ ավարտվել է «Փակ շուկայի» տարածքում ապօրինի կառույցների իրականացումը: Այլ կերպ ասած, քաղաքապետարանը նեղություն է քաշել, տեղեկացրել է, որ ապօրինի շինարարություն է ընթանում, սակայն Ալեքսանյանը, մեղմ ասած, բանի տեղ չի դրել, եւ դրանով քաղաքապետարանի առաքելությունն ավարտվե՞լ է: Եթե քաղաքապետարանն է պատասխանատու շինարարության պահպանման համար եւ եթե նկատել է, որ օրենք է խախտվում, ապա պետք է դիմեր իրավապահ մարմիններին եւ հարցը կարգավորեր օրենքի դաշտում, առանց ձեւականությունների եւ ժամկետանց զղջումների:
ՄԻՊ Կարեն Անդրեասյանը զարմացած է, որ եթե քաղաքապետարանն էլ չի դիմել, սակայն նման հայտարարություն է տարածել, ապա իրավապահ մարմինների ու առաջին հերթին ոստիկանության դիրքորոշումը պետք է այլ լիներ:
Այս առումով անհասկանալի է իրավապահ մարմինների եւ առաջին հերթին` ՀՀ ոստիկանության դիրքորոշումը: ՀՀ քրեական օրենսգրքով պատասխանատվություն է նախատեսված ինչպես ֆիզիկական կամ իրավաբանական անձի կողմից կրկնակի վարչական պատասխանատվության ենթարկվելուց հետո ապօրինի շինության կառուցումը չդադարեցնելու համար, այնպես էլ պատասխանատու պաշտոնատար անձանց կողմից շինությունների ինքնակամ կառուցումը կասեցնելու միջոցներ չձեռնարկելու համար: Իրավապահ մարմինների կողմից մերժվել է քրեական գործի հարուցումը թե՛ վերը նշված եւ թե՛ պատմության ու մշակույթի հուշարձանները ոչնչացնելու կամ վնասելու հանցագործությունների դեպքերի կապակցությամբ, սակայն այդ որոշումների հիմնավորվածությունը վիճարկվելու է նաեւ դատարանում:
Մարդու իրավունքների պաշտպանն ակնկալում է նախ դատարանի կողմից քրեական գործերի հարուցումը մերժելու մասին որոշումների հիմնավորվածության մանրակրկիտ եւ անկողմնակալ ստուգում, երկրորդ` այս օրերին հուշարձանի մոտ իրականացվող բողոքի ակցիայի մասնակիցների բոլոր իրավունքների եւ օրինական շահերի, այդ թվում` անձնական անվտանգության եւ անձեռնմխելիության պաշտպանություն ոստիկանության կողմից:
Կատարված ապօրինությունների համար, ի վերջո, պետք է իրագործվի պատասխանատվության անխուսափելիության սկզբունքը, առավել եւս, երբ խոսքը վերաբերում է պետության հատուկ պահպանության ներքո գտնվող պատմամշակութային հուշարձանին:
