Բան Կի Մունի վրա ճնշում է գործադրվել
Ռուսաստանի արտգործնախարար Սերգեյ Լավրովը անհամոզիչ է անվանել Սիրիայում քիմիական զենքի կիրառման վերաբերյալ Մոսկվային ԱՄՆ-ի ներկայացրած ապացույցները: Այդ մասին հաղորդում է ՌԻԱ գործակալությունը:
«Մեզ ցույց էին տալիս փաստաթղթեր, որոնք չէին պարունակում որեւէ կոնկրետ բանՙ ո՛չ աշխարհագրական կոորդինատներ, ո՛չ անուններ, ո՛չ էլ ապացույցները, թե փորձանմուշները վերցրել են պրոֆեսիոնալները», հայտարարել է Լավրովը: ՌԴ արտգործնախարարն ավելացրել է, որ ամերիկյան կողմը հրաժարվել է ներկայացնել առավել մանրամասն հաստատումներ, վկայակոչելով այդ տվյալների գաղտնիությունը:
Լավրովը նաեւ պատմել է ՄԱԿ-ի գլխավոր քարտուղարի վրա Մեծ Բրիտանիայի եւ Ֆրանսիայի գործադրած ճնշման մասին: Լավրովի խոսքերով, 2013 թ. մարտին Սիրիայի իշխանությունները ՄԱԿ-ին խնդրել էին փորձագետներ գործուղել Հալեպ, որտեղ «պատահել էր քիմիական զենքի կիրառություն հիշեցնող միջադեպ»: Բան Կի Մունը սկզբում համաձայնել է դրան, բայց հետո փոխել է որոշումը: «Նրա վրա ճնշում էին գործադրել: Ես այստեղ ոչինչ չեմ թաքցնի, քանի որ նրանք այդ մասին բացեիբաց խոսել են: Մեծ Բրիտանիան եւ Ֆրանսիան ասել էին, որ այդ կոնկրետ միջադեպի քննության համար պարզապես տեսուչներ գործուղել չի հաջողվի», հայտարարել է Լավրովը:
Սեպտեմբերի 1-ին ԱՄՆ պետքարտուղար Ջոն Քերրին հայտարարել էր, թե ամերիկացիները ստացել են Սիրիայի իշխանությունների կողմից զարին գազի օգտագործման ապացույցներ: Ավելի վաղ Սպիտակ տունը հայտարարել էր Սիրիայի պաշտպանության նախարարի եւ քիմիական զորքերի ղեկավարի հեռախոսազրույցի կալանման մասին, այդ տվյալներն անվանելով քիմիական գրոհին Ասադի կողմնակիցների մասնակցության «անհերքելի ապացույցներ»:
