«Ազատագրենք հուշարձանն օլիգարխից» հասարակական շարժման նախաձեռնող խումբը հանդես է եկել հայտարարությամբ, որում նշվում է. «Հին Երեւանի սրտում գտնվող «Ծածկած շուկայի» սեփականատեր օլիգարխը մեր աչքի առաջ բարբարոսաբար քանդում եւ աղճատում է հանրապետական նշանակության հուշարձանը: Իրեն օրենքից վեր դասող սեփականատեր օլիգարխը ոչ միայն չի ապահովել հուշարձանի պահպանությունն ու անվթարությունը, այլեւ անգամ օրենքով սահմանված տուգանքների վճարումից հետո դիտավորյալ կերպով հետեւողականորեն շարունակել է դրա քանդման ու վերակառուցման ապօրինի գործունեությունը: Ըստ մամուլի տեղեկությունների` սեփականատերը պատրաստվում է ս.թ. սեպտեմբերի սկզբին շահագործման հանձնել խեղված ու խաթարված հուշարձանի տեղում ապօրինաբար կառուցվող առեւտրի օբյեկտը»:
«Ազատագրենք հուշարձանն օլիգարխից» հասարակական շարժման նախաձեռնող խմբի անդամները կոչ են անում սկսել օլիգարխի ձեռքից հուշարձանի հասարակական ազատագրման պայքար:
Շարժումն իր առջեւ նպատակ է դրել «Ծածկած շուկայի» սեփականատիրոջը օրենքով սահամանված կարգով ենթարկել պատասխանատվության, հարկադրել նրանՙ հատուցել հուշարձանին հասցված վնասը եւ վերականգնել դրա նախկին վիճակը:
