56-ամյա Բենիկ Իսրայելյանը շարունակում է զարմացնել իր յուրօրինակ նվաճումներով: Նա Գինեսի ռեկորդների գրքում գրանցվելու իր 4-րդ հայտը ներկայացրեցՙ բարելավելով նախկին ցուցանիշը: Արցախցի դյուցազնը աջ ձեռքի միջնամատով բարձրացրեց 129 կգ 850 գ ծանրությունըՙ պահելով 5 վրկ 20 սմ բարձրության վրա: Այս նվաճումը գրանցվեց հայկական «Դյուցազնագրքում»: Այժմ «Դյուցազնագրքի» հանձնախումբը Վարդան Թովմասյանի գլխավորությամբ անհրաժեշտ փաստաթղթերն ու տեսանյութն է պատրաստում, որպեսզի դրանք ուղարկվեն Լոնդոնՙ Գինեսի ռեկորդների գրքում Բենիկ Իսրայելյանի հերթական նվաճումը գրանցելու համար:
«Հաղթանակ» զբոսայգում կազմակերպված միջոցառմանը մեծ թվով հանդիսականներ էին հետեւում: Նրանց թվում էր նաեւ ՀԱՕԿ-ի փոխնախագահ Դերենիկ Գաբրիելյանը, որը հիացած էր մնացել Բենիկ Իսրայելյանի հերթական նվաճմամբ, նշելով, որ դա իսկական հայկական ռեկորդ է:
Բենիկ Իսրայելյանը նախկինում զբաղվել է ծանրամարտով եւ վոլեյբոլով: Արդեն 25 տարի է, ինչ նա մասնագիտացել է մատներով տարբեր ծանրություններ բարձրացնելու գործում: Ամենօրյա մարզումները տվել են իրենց ցանկալի արդյունքը: 2011-ին նրա անունը գրանցվեց Գինեսի ռեկորդների գրքում: Այն ժամանակ Բենիկ Իսրայելյանը աջ ձեռքի միջնամատով բարձրացրել էր 116,9 կգ ծանրություն: Հետագայում Բենիկը 2 անգամ բարելավեց իր ռեկորդային ցուցանիշները, որոնք դեռեւս իրենց գրանցմանն են սպասում Գինեսի ռեկորդների գրքում:
Իսկ ավելի վաղՙ 2000-ին, Իսրայելյանի անունը գրանցվել է հայկական «Դյուցազնագրքում»ՙ 147,5 կգ: Հետագա տարիներին Բենիկը բարելավել է ցուցանիշըՙ հասցնելով մինչեւ 175 կգ-ի:
