Իշխանությունները հերքում են այդ պնդումները
«Ալ Արաբիա» հեռուստաալիքը համացանցում հաղորդում է, թե Դամասկոսից արեւելքՙ Գուտայի գյուղատնտեսական շրջանում օգոստոսի 20-ին քիմիական զենք է գործածվել, որի հետեւանքով առնվազն 600 մարդ է զոհվել: Հեռուստաալիքը հայտնում է, որ քիմիական գրոհին վերաբերող տեղեկությունները ստացվել են սիրիացի ընդդիմադիրների «Հեղափոխական հրամանատարության խորհուրդ»-ից:
Syrian Observatory for Human Rights ընդդիմադիր կազմակերպությունը իր հերթին հաղորդում է Դամասկոսի արվարձանների «ռմբակոծությունների բազմաթիվ զոհերի» մասին:
Ապստամբների «Սիրիական ազատ բանակի» մամլո քարտուղար Լուայ Միքդադը պնդում է, թե քիմիական գրոհի զոհերի թիվն անցնում է 1000-ից: Նրա խոսքերովՙ կառավարական զորքերը թունավոր արկերով հարվածել են 10 թիրախների, եւ դրանցից յուրաքանչյուրում իբր հարյուրից ավելի մարդ է զոհվել:
Ուրիշ աղբյուրներ այս տեղեկությունը չեն մեկնաբանում: SANA պետական լրատվական գործակալությունը հաղորդում է Դամասկոսի շրջակայքում ծավալված մարտերի մասին, որտեղ, ըստ պաշտոնական տեղեկատվության, կառավարական զորքերը ջախջախել են ընդդիմության մի քանի ջոկատ:
«Ազգը» արդեն գրել է, որ օգոստոսի 18-ից Սիրիայում են ՄԱԿ-ի մի խումբ տեսուչներ, որոնց խնդիրն է քննել քիմիական զենքի կիրառման փաստերը Հալեպին մերձակա Խան ալ Ասալ բնակավայրում, ինչպես նաեւ Աթայբայում (Դամասկոսի մոտ) եւ Հոմսում:
Սիրիայի կառավարությունը եւ ընդդիմությունը միմյանց պարբերաբար մեղադրում են քաղաքացիական պատերազմում թունանյութերի օգտագործման մեջ:
Ֆրանսպրես գործակալությունը նշում է, որ ներկա պահին անհնար է ստուգելՙ Գուտայում քիմիական զենք իրոք օգտագործվե՞լ է: Դամասկոսը պաշտոնապես հերքում է այդ զենքի կիրառման հետ կապված լուրերը: Կառավարական աղբյուրներից մեկը օգոստոսի 21-ին Սիրիայի պետական հեռուստատեսության եթերում հայտարարեց, որ քիմիական զենքի կիրառմանն առնչվող վերջին պնդումները «ոչ մի կերպով» ճիշտ չեն եւ նպատակ ունեն շեղելու Սիրիայում գտնվող ՄԱԿ-ի տեսուչների ուշադրությունը: Անկախ դիտորդներից ոմանք դիտել են տալիս, որ հենց այս օրերին, երբ գտնվում են Սիրիայում, իշխանությունը չեր կարող նման քայլերի դիմել:
