Հոպկինսի հետ մենամարտի նոր ժամկետը հոկտեմբերի 26-ն է
Ինչպես հայտնի է, հայ պրոֆեսիոնալ բռնցքամարտիկ Կարո Մուրադը կիսածանրքաշային կարգում IBF-ի վարկածով աշխարհի չեմպիոնի տիտղոսը վիճարկելու է չեմպիոնական գոտու տեր, լեգենդար Բեռնարդ Հոպկինսի հետ մենամարտում: Նախապես որոշված էր, որ մենամարտը կայանալու է հուլիսի 13-ին ԱՄՆ-ում: Սակայն ԱՄՆ-ի իշխանությունները մուտքի վիզա չէին տրամադրել Կարո Մուրադին, ուստի մենամարտի անցկացումը հետաձգվեց:
2 բռնցքամարտիկների նոր հանդիպման վայր նշանակվեց ամերիկյան Ատլանտիկ Սիթին: Մենամարտը պետք է կայանար հոկտեմբերի 19-ին, սակայն այն մեկ շաբաթով հետաձգվել ու տեղափոխվել է հոկտեմբերի 26-ին: Պատճառն այն է, որ հոկտեմբերի 19-ին կայանալու է WBO-ի վարկածով առաջին միջինքաշային կարգում աշխարհի ժամանակավոր չեմպիոն, ամերիկացի Մայք Ալվարադոյի եւ ռուսաստանցի Ռուսլան Պրովոդնիկովի մենամարտը, որը եւս հեռարձակվելու է:
Կարո Մուրադը լրջորեն է նախապատրաստվում մարզական իր կարիերայի ամենապատասխանատու մենամարտին եւ հույս ունի նվաճելու աշխարհի չեմպիոնի տիտղոսը. «Մեր մենամարտը պետք է արդեն կայացած լիներ, սակայն վիզայի խնդիրներ ծագեցին, որոնք արդեն լուծված են: 2011-ից սպասում եմ աշխարհի չեմպիոնի տիտղոսը նվաճելու իմ հնարավորությանը: Եվ ահա եկել է ժամանակը ստուգելու Հոպկինսի հին ոսկորների ամրությունն ու հանրաճանաչ դառնալու: Հուսով եմ, որ Հոպկինսը հաջող է անցկացրել ամառը»:
«Ուրախ եմ, որ Կարո Մուրադի հետ հանդիպումը վերջապես կայանալու է: Մուրադն աշխարհի չեմպիոնի տիտղոսի պարտադիր հավակնորդն է եւ թեկուզ 3-ամսյա ուշացումով, մրցելու է 48-ամյա չեմպիոնիս հետ: Նա ինձ հնարավորություն ընձեռեց ավելի շատ ժամանակ անցկացնել ընտանիքիս հետ եւ ավելի նպատակասլաց մարզվել: Հոկտեմբերի 26-ին պատրաստ կլինեմ թե՛ ֆիզիկապես, թե՛ հոգեպես: Մուրադը գիտի, որ թեեւ պատկառելի տարիքիս, հանդիպում է անվանի չեմպիոնի հետ: Ես ինձ 20 տարեկանի պես եմ զգում», հայտարարել է Բեռնարդ Հոպկինսը:
Տեղեկացնենք, որ ԱՄՆ-ում կայանալիք Կարո Մուրադի եւ Բեռնարդ Հոպկինսի մենամարտի տոմսերի գինը տատանվում է 25-300 դոլարի սահմաններում:
