ԱՐՄԻՆՖՈ
Առայժմ պարզ չէ, թե Հայաստանի եւ Եվրոմիության միջեւ ասոցացման համաձայնագրի ստորագրումն ինչպես կանդրադառնա Հայաստանի եւ Ռուսաստանի հարաբերությունների վրա: Հայաստանը պետք է չափազանց ստույգ պարզի, թե Եվրոմիությունն ինչ է առաջարկում Հայաստանին այդ փաստաթղթի միջոցով: Այդ մասին հայտարարել է Ռուսաստանի հայերի միության նախագահ Արա Աբրահամյանն Արմինֆոյի թղթակցի հետ զրույցում:
ՌՀՄ ղեկավարը կարծում է, որ ԵՄ-ի հետ ասոցացման պայմանագիրն անհրաժեշտ է քննարկել հասարակայնության լայն շերտերի, լուրջ փորձագետների` իրավաբանների, տնտեսագետների, քաղաքագետների, Հայաստանի բոլոր քաղաքական ուժերի ներգրավմամբ: «Կարծում եմ, որ այդ հարցում հարկավոր է լուրջ, պրոֆեսիոնալ մոտեցում: Դա այնքան լուրջ հարց է, որ մենք, պարզապես, չենք կարող եւ չպետք է ղեկավարվենք այսրոպեական հույզերով: Հարկավոր է ուսումնասիրել պայմանագրի յուրաքանչյուր կետ, պարզել, թե մենք ինչ ենք կորցնում ԵՄ-ի հետ մերձեցման դեպքում: Եվ այդ ամենից հետո, կշռադատելով բոլոր «կողմ» եւ «դեմ» հանգամանքները, որոշել, թե արդյոք պե՞տք է ստորագրել այդ համաձայնագիրը», – ասել է Աբրահամյանը:
ՌՀՄ ղեկավարն ընդգծել է, որ առայժմ հնարավոր չէ միանշանակ գնահատականներ տալ այն առնչությամբ, թե ՌԴ-ն ինչ դիրքորոշում կդրսեւորի ասոցացման համաձայնագրի ստորագրման դեպքում: Ռուսաստանը Հայաստանի ռազմավարական գործընկերն է, երկու երկրների միջեւ գոյություն ունեն լայն իրավական եւ պայմանագրային դաշտ, սերտ առեւտրատնտեսական եւ ռազմաքաղաքակաան հարաբերություններ:
«Ամեն բան հարկավոր է հաշվի առնել զարգացման վեկտորը որոշելիս: Մենք սխալվելու իրավունք չունենք: Մեր բոլոր գործողությունները պետք է լիովին համապատասխանեն մեր ազգային եւ պետական շահերին», կարծում է Աբրահամյանը:
