Աբովյան քաղաքի Սուրբ Ստեփանոս եկեղեցու երիտասարդները մեզ ուղարկած նամակով դիմում են Աբովյանի քաղաքապետ Կարապետ Գուլոյանին Սարալանջ թաղամասում գտնվող Տրդատ Գ թագավորի արձանի շուրջն առկա անխնամ ու անբարեկարգ վիճակը փոխելու խնդրով: Մինչ ներկայիս վիճակը նկարագրելը նամակում նշվում է, որ արձանի մատները ներկել էին ու դրան տվել «կանացի տեսք»: Քաղաքակիրթ մարդիկ ներկն արդեն մաքրել են, սակայն արձանի վրա շարունակում են մնալ զանազան գրություններ, լուսավորության բացակայության պատճառով էլ հուշարձանի շրջակա տարածքը դառնում է հարմար վայր «ռազբորկաների» համար ու գրավում հարբեցողներին:Հուշարձանի մոտակայքում կարելի է տեսնել բազմաթիվ շշեր ու ապակու կտորներ:
Հուլիսի 28-ն երիտասարդները մաքրման որոշ աշխատաքներ կատարել են, սակայն ասում են` աշխատանքերն ավարտին հասցնել չեն կարողացել աշխատանքային որոշ գործիքներ, նյութեր, նաեւ լիազորություններ չունենալու պատճառով: Հետեւաբար դիմում են քաղաքապետին, որպեսզի վերջինս հանձնարարականներ տա արձանը եւ դրան հարող տարածքը բարեկարգելու համար:
