Ռուսաստանի ֆուտբոլի առաջնության 3-րդ տուրի ավարտական խաղում Կրասնոդարի համանուն թիմը սեփական հարկի տակ 2-1 հաշվով պարտության մատնեց «Ամկարին»: Ընդ որում «Կրասնոդարը» խաղի ընթացքում մրցակցին զիջում էր հաշվի մեջ: «Կրասնոդարը» 4 միավորով 9-րդ տեղում է:
«Ամկարի» հետ խաղին չմասնակցեց Մարկոս Պիզելին, որն այդպես էլ մնաց պահեստայինների նստարանին: Հիշեցնենք, որ «Ռոստովի» հետ նախորդ տուրի խաղում էլ Մարկոսը խաղադաշտ էր մտել հանդիպման վերջում:
«Կրասնոդարի» գլխավոր մարզիչ Սլավոլյուբ Մուսլինը հետեւյալ կերպ է բացատրել Մարկոսին չխաղացնելու փաստը. «Հանդիպման 2-րդ խաղակեսում, երբ 2 գոլ խփեցինք, որոշեցինք պահպանել հաղթական հաշիվը: Դրա համար էլ խաղադաշտ մտցրեցի Տուբիչին: Իսկ Մարկոսն ամեն դեպքում հարձակողական ոճի ֆուտբոլիստ է, բացի այդ էլ նա ներկայումս լավագույն մարզավիճակում չէ: Սակայն նա բարձրակարգ ֆուտբոլիստ է եւ մենք հույսեր ենք կապում նրա հետ»:
Հիշեցնենք, որ Մարկոսը «Կուբանից» «Կրասնոդար» տեղափոխվեց հիմնականում այն պատճառով, որ խաղալու քիչ հնարավորություն էր ստանում: Սակայն առայժմ «Կրասնոդարում» էլ ՀՀ հավաքականի կիսապաշտպանի գործերը լավ չեն ընթանում:
