Ֆուտբոլային գործակալ Դմիտրի Սելյուկը հայտարարել է, որ «Կուբանին» լուրջ պատժամիջոցներ են սպառնում Արաս Օզբիլիսին Մոսկվայի «Սպարտակին» վաճառելու գործընթացի սխալ կազմակերպման համար: Մինչեւ Օզբիլիսի «Սպարտակ» տեղափոխվելը Սելյուկը նշել էր, որ իրեն է պատկանում հայ ֆուտբոլիստի տրանսֆերային իրավունքների 50 տոկոսը, որն ինքը վաճառել է Մոսկվայի «Դինամոյին»:
«Եթե «Սպարտակի» գլխավոր տնօրեն Ասխաբաձեն ինձ հետ խոսեր մինչեւ «Դինամոյին» տրանսֆերային իրավունքները վաճառելը, ապա Օզբիլիսի համար ավելի քիչ գումար կվճարեին: Իսկ «Կուբանն» ամեն դեպքում մեղավոր է, քանի որ մինչեւ ֆուտբոլիստին վաճառելը պարտավոր էր տրանսֆերը համաձայնեցնել մյուս կողմի հետ: Սակայն «Կուբանի» ղեկավարությունը դա չարեց եւ գաղտնի վաճառեց Օզբիլիսին: Ավելին, «Կուբանն» իրավունք չուներ ֆուտբոլիստին վաճառել որոշակի գումարից պակաս գումարով: Սակայն կրասնոդարյան ակումբը նույնիսկ չհրապարակեց տրանսֆերի գումարը: Կարծում եմ, որ «Կուբանին» լուրջ պատժամիջոցներ են սպառնում:
Շատ վրդովված եմ տեղի ունեցածով: Օլեգ Մկրտչյանի հետ մոտ 17 տարի ծանոթ եմ: Նա եղել է մեր տանը, երեխաներիս խաղալիքներ է նվիրել: Տեղի ունեցածից հետո կցանկանայի նրան վերադարձնել խաղալիքները», նշել է Սելյուկը:
«Սպարտակի» հետ 5-ամյա պայմանագիր կնքած Արաս Օզբիլիսը տարեկան 1,5 մլն եվրո աշխատավարձ կստանա: Իսկ այն թիմը, որը կցանկանա առաջիկա 5 տարիների ընթացքում գնել Օզբիլիսին, պետք է նրա դիմաց 40 մլն եվրո վճարի «Սպարտակին»:
