Դրանք գյուղացիներին կտրամադրվեն զեղչով եւ արտոնյալ պայմաններով
Ինչպես տեղեկացանք կառավարության տեղեկատվության եւ հասարակայնության հետ կապերի վարչությունից, 2013-ի մայիսի 31-ին Բելառուս կատարած այցի շրջանակում Հայաստանի վարչապետ Տիգրան Սարգսյանի եւ Բելառուսի վարչապետ Միխայիլ Մյասնիկովիչի պայմանավորվածությանն համաձայն բելառուսական կողմն ինքնարժեքով Հայաստանին է տրամադրել շուրջ 300 տրակտոր, որոնք երեկ հասան Հայաստան:
Վարչապետ Տիգրան Սարգսյանը այցելել է Կոտայքի մարզի Նուռնուս համայնք` Փոքր եւ միջին ձեռնարկատիրության զարգացման ազգային կենտրոնի կողմից (ՓՄՁ ԶԱԿ) Հայաստան ներմուծվող «Բելառուս» մակնիշի տրակտորների առաջին խմբաքանակին ծանոթանալու նպատակով: Նա հետաքրքրվել է տրակտորների տեխնիկական հնարավորություններով եւ անձամբ փորձարկել դրանցից մեկը: Այնուհետեւ ստորագրվել է տրակտորի ձեռքբերման առաջին պայմանագիրը` ՓՄՁ ԶԱԿ-ի տնօրեն Վարազդատ Կարապետյանի եւ Շիրակի մարզի Ազատան համայնքի բնակիչ Խոսրով Բաղդասարյանի միջեւ: Առաջին գնորդը նախապատվությունը տվել է վարչապետի վարած տրակտորին եւ շնորհակալություն հայտնել մատչելի պայմաններով գյուղտեխնիկայի տրամադրման համար:
2013-ի արտադրության -82.1 մակնիշի ժամանակակից տրակտորներն առանց միջնորդի գնվել են գործարանից եւ մեխանիզատորներին ու ֆերմերներին են առաջարկվում շուկայականից մոտ 30 տոկոսից ցածր գնով` կանխիկ (6.700.000 դրամ) եւ լիզինգային տարբերակով: Լիզինգն իրականացնում է հետեւյալ պայմաններով` 20 տոկոս կանխավճար, տարեկան 9 տոկոս տոկոսադրույք, ներառյալ ռիսկի ապահովագրումը, ժամկետը` 6 տարի տրակտորների համար եւ 3 տարի` հարակից սարքավորումների համար:
