Պռոշյան համայնքի ընտրությունների հաջորդ օրը գյուղապետի թեկնածու, երկու հիմնական մրցակիցներից Վովա Սահակյանը դիմել էր ԿԸՀ` ընտրությունների արդյունքների վերահաշվարկի պահանջով: Վերահաշվարկը երեկ տեղի է ունեցել, որը մեծ փոփոխություններ չի արձանագրել: ՀՀԿ-ական թեկնածու, նախնական արդյունքներով Պռոշյան համայնքի ղեկավար ընտրված Արթուր Մուրադյանի 1317 ձայներն ավելացել են 8-ով, իսկ Վ. Սահակյանի 1241-ը` 3-ով:
Իսկ ահա ՀՅԴ գերագույն մարմինը երեկ Պռոշյանի ընտրությունների մասին հայտարարություն է տարածել, գնահատելով, որ դրանք անցել են վերջին շրջանում տեղի ունեցած բոլոր մակարդակների ընտրություններին հատուկ տրամաբանությամբ, կրկին գործի են դրվել հանրածանոթ բոլոր մեթոդները` վարչական լծակների կիրառում, արտաքին միջամտություն, պարտադրանք, ընտրակաշառք: Արդյունքում, ըստ հայտարարության, հաղթանակն արձանագրվել է սպանված համայնքապետ Հրաչ Մուրադյանի` նախորդ ընտրություններում մրցակից հանրապետական թեկնածուի օգտին.«Քաղաքական ցինիզմի այսօրինակ դրսեւորումը խաթարեց ընտրական գործընթացը, խորացրեց համայնքում առկա լարվածությունը:
Հակառակ այս իրողությանը` մենք հորդորում ենք Պռոշյանի բոլոր բնակիչներինՙ տուրք չտալ նոր լարվածություն ստեղծելու հնարավոր փորձերին, միաժամանակ վստահեցնում ենք, որ հասարակության համախմբմամբ հետամուտ ենք լինելու Հրաչ Մուրադյանի սպանության լիարժեք բացահայտմանը եւ մեղավորներին պատժելուն»,-ասված է հայտարարության մեջ:
