Առայժմ միայն հայտարարությունների տեսքով կարծես թե հակամարտություն է սկսվում վարչապետ Տիգրան Սարգսյանի եւ Հայ հեղափոխական դաշնակցության միջեւ: Ավելի շուտՙ Դաշնակցությունն է հակամարտություն ձեռնարկել վարչապետի դեմ: ՀՅԴ բյուրոյի ներկայացուցիչ Հրանտ Մարգարյանն օրեր առաջ հայտարարել էր, որ վարչապետը կեղտոտ բամբասանքներ է պատվիրում Դաշնակցության մասին եւ տեղեկատվական պատերազմի շրջանակներում պատերազմ հայտարարում կուսակցությանը: Վերջին շրջանում խոսակցություններ էին շրջանառվում, որ Դաշնակցության ներսում լուրջ դժգոհություններ կան, մասնավորապես փորձեր են արվում կուսակցության բյուրոյի ղեկավարի պաշտոնից հեռացնելու Հրանտ Մարգարյանին: Մարգարյանի գնահատմամբՙ հատկապես ընտրություններից հետո եղել են դժգոհություններ, սակայն այդ խնդիրները հարթվել են ու շրջանառվող խոսակցությունները դրսից գործադրվող ճիգեր ենՙ Դաշնակցության մեջ ճեղքեր բացելու համար:
«Դրանց հեղինակը վարչապետն է: Տիգրան Սարգսյանն իր տնտեսական ապիկար գործունեության պատճառով Դաշնակցության կողմից քննադատության ենթարկվելուց հետո բացեիբաց հայտարարել է, որ ինքը պատերազմ է հայտարարում Դաշնակցությանը, եւ այս տեսակ կեղտոտ լրատվություն, կեղտոտ բամբասանքանման լրատվությունն իր գործն է: Մարդը, որ թույլ է, տկար, այս միջոցներով փորձում է հարցեր լուծել: Ուրիշ ոչինչ չկաՙ մենք ոչ սիրահարված ենք եւ ոչ էլ ատում ենք այդ վարչապետին, բայց ձախողակ վարչապետ է, եւ դրա համար այս մեթոդներն է օգտագործում իր հարցերը կարգավորելու համար», հայտարարել էր Հրանտ Մարգարյանը:
Նման հայտարարությանը բավական մեղմ պատասխան էր հնչել կառավարությունից: «Վարչապետը մեծ հարգանքով է վերաբերվում ավանդական կուսակցություններին, քանի որ դրանք ազգային հարստություն են», հայտարարել են կառավարությունիցՙ միաժամանակ զարմանք հայտնելով, որ Դաշնակցությունում նման տեսակետներ կան:
«Բավարարվեք եղածով», երեկ խորհուրդ տվեց ԱԺ ՀՅԴ խմբակցության քարտուղար Աղվան Վարդանյանը ՙ միաժամանակ չբացառելով, որ ՀՅԴ-ում որոշակի փոփոխություններ կլինեն:
«ՀՅԴ-ն ապրող, կենդանի կառույց է եւ, ի տարբերություն շատ շատերի, առողջ կառույց է, որտեղ անընդհատ քննարկումներ, տեսակետների բախումներ են լինում, մտքեր են առաջանում, եւ այսօր մեզ համար իսկապես այդպիսի շրջան է: Ուզենք թե չուզենք, անկախ ընտրություններին տրված մեր գնահատականներից, մենք խնդիրներ ունենք, երեք ընտրություններում մեծ հաշվով մենք ձախողվել ենք, եւ բնական է, որ մեր ներսում մենք քննարկում ենք, թողնենք մի կողմ ընտրությունների բնույթը, ընտրակաշառքը, վարչական ռեսուրսը, բայց գուցե ինչ-որ բան մեզ մոտ էլ է սխալ, մենք էլ ինչ-որ բաներում թերացել ենք: Մենք քննարկումների մեջ ենք, եւ դրանք առողջ քննարկումներ են, ոչ առաջին օրն է, ոչ էլ վերջին, որ փորձում են ՀՅԴ-ի մեջ պառակտումներ, բաժանումներ տեսնել, հանգիստ եղեք, որեւէ խնդիր այստեղ մի տեսեք»:
Այժմ Դաշնակցությունում այլ հարցով են զբաղված: Կուսակցությունը ձեռնամուխ է լինելու, որ Պռոշյանի նախկին գյուղապետ Հրաչ Մուրադյանի սպանությունը բացահայտվի: Հարցով կզբաղվի «Հրաչ Մուրադյան. Արդարության պահանջ» հասարակական շարժումը: «Մեզ պետք է, որ բացահայտվեն Հրաչ Մուրադյանի սպանության իրական մեղավորները, չենք ուզում, որ դատվեն անմեղ մարդիկ, եւ ի վերջո, այս գործի իրական բացահայտումը վստահության քվե կարող է դառնալ մեր արդարադատության համակարգի համար:
Տուժողի իրավապաշտպան, փաստաբան Մելանյա Առուստամյանը նշեց, որ տարիներ շարունակ ազատամարտիկ-գյուղապետին հետապնդել են, սպառնացել, իսկ սպանությունն այդ հետապնդումների վերջին օղակն էր: «Տարիներ առաջ հրդեհել էին Հրաչին պատկանող խոտի դեզը, ոստիկանները եկան, ասացինՙ միտումնավոր է արված, հետո առեւանգել էին Մուրադյանի եղբոր որդուն, հետո, երբ Հրաչը գնաց ազատելու եղբոր որդուն, կրակեցին նրանց մեքենայի վրա: Հիմա այդ կրակոցների գործը կարճվել է, բայց եթե չկարճվեր էլ, քննություն այնպես էր տարվում, որ մեղավորի դերում հենց Հրաչ Մուրադյանն է դառնում»:
Դաշնակցության անդամ Հրաչ Մուրադյանը սպանվել էր ապրիլի 2-ին գյուղապետարանի դիմաց: Նրա սպանությունը կատարելու կասկածանքով արդեն 2 ամսից ավելի կալանավորվել է նույն գյուղից Արայիկ Պետրոսյանը:
