«Գլաձոր» համալսարանը «Որակի ապահովման ներբուհական համակարգի ներդրման կամ դրանց հետագա բարելավման նպատակով բուհերին դրամաշնորհների տրամադրում» ծրագրի շրջանակներում իր դասախոսական կազմի եւ ուսանողների շրջանում անցկացնում է վերապատրաստումներ: Համալսարանի Որակի ապահովման կենտրոնի ղեկավար Հասմիկ Վարդանյանի տեղեկացմամբ, մինչ օրս համալսարանում անցկացվել են 3 վերապատրաստումներ, որոնց նպատակը բուհում որակի մշակույթի տարածումն է, մասնավորապես, ներքին շահակիցների շրջանում տեղեկացվածության աստիճանի բարձրացումը եւ ձգտումը, որպեսզի նրանք դառնան այդ որակի մշակույթի կրողը, գիտակցեն իրենց դերն այդ գործընթացներում:
Ըստ Հ. Վարդանյանի, առաջին վերապատրաստումը նվիրված էր որակի ապահովման համակարգի բարելավմանը, այդ համակարգում ներգրավված ներքին շահակիցների դերերի պարզաբանմանը, նրանց պարտականությունների եւ իրենց կողմից իրականացվող անհրաժեշտ գործողությունների շրջանակը:
Երկրորդ վերապատրաստումը նվիրված էր դասախոսական կազմի որակի ապահովմանը: Վերապատրաստմանը ներգրավված էին համալսարանի պրոֆեսորադասախոսական եւ վարչական կազմի ներկայացուցիչներ: Նպատակը համակարգում իրականացվող գործընթացների համապատասխանեցումն էր եվրոպական չափանիշներին եւ ուղենիշներին:
Երրորդ վերապատրաստումը վերաբերում էր ուսանողների գնահատման համակարգին: Վերապատրաստման թիրախային խումբն ուսանողներն ու համալսարանի վարչական աշխատակազմն էր: Վերապատրաստման ընթացքում ներկայացվեց ոլորտում առկա առաջավոր փորձը, դրա տեղայնացման հնարավորությունները համալսարանում:
Հաջորդ վերապատրաստումը ուղղված է լինելու մասնագիտական կրթական ծրագրերի մշակման, հաստատման, վերանայման եւ մշտադիտարկման բարելավմանը:
Ինչպես տեղեկացրեց Հ. Վարդանյանը, վերապատրաստումների արդյունավետությունը գնահատելու հարցում կիրառվում են համապատասխան մեխանիզմներ, հարցաթերթի օգնությամբ փորձ է արվում պարզել վերապատրաստումների կարեւորությունը եւ ստանալ մասնակիցների գնահատականը: Վերապատրաստվողները հնարավորություն են ունենում նաեւ ներկայացնել իրենց առաջարկները ինչպես տվյալ վերապատրաստման կազմակերպվածության, այնպես էլ հաջորդ վերապատրաստումների բարելավման ուղղությամբ:
«Այս ծրագրի շրջանակներում անցկացվող վերապատրաստումների հիմնական նպատակը աշխատաշուկայի պահանջներին համապատասխան որակյալ շրջանավարտ պատրաստելն է, իսկ անցկացվող վերապատրաստումները կրթության որակի բարձրացմանն ուղղված քայլեր են, որոնք ուղղակիորեն նպաստում են այդ նպատակի իրականացմանը»,- նշեց Գլաձոր» համալսարանի Որակի ապահովման կենտրոնի ղեկավարը:
