Երկու ամիս է, ինչ ճշգրտվում են կենսաթոշակառուների ցուցակները, ճշգրտվել են մոտ 11 հազար անձանց տվյալներ, եւս 300-ինն էլ ճշգրտման փուլում են: Այս մասին երեկ լրագրողներին հայտնեց աշխատանքի եւ սոցիալական հարցերի նախարար Արտեմ Ասատրյանըՙ խոսելով կենսաթոշակների վճարման ուշացման մասին:
«Որեւէ տվյալի ոչ ճշգրիտ լինելու դեպքում համակարգը թույլ չի տալիս ձեւավորել վճարման ցուցակ տվյալ անձի վերաբերյալ», նշեց նախարարըՙ ավելացնելով, որ սոցիալական ապահովության պետական ծառայության աշխատակիցներն աշխատում են նաեւ հանգստյան օրերինՙ հնարավորինս շուտ ճշգրտման աշխատանքներն ավարտելու համար: Նրա հավաստմամբՙ առաջիկա 1-2 օրերի ընթացքում այդ հարցերը կլուծվեն, եւ բոլոր կենսաթոշակառուները կստանան թոշակները:
