Վ. ՊՈՂՈՍՅԱՆ
Նոյեմբերի վերջին Վիլնյուսում տեղի է ունենալու Արեւելյան գործընկերության գագաթաժողովը, որի ընթացքում նախատեսվում է, որ ԵՄ-Հայաստան Ասոցացման համաձայնագիրը, այսպես կոչված, կնախաստորագրվի: Վերջին շրջանում հենց այս թեմայի առնչությամբ, թերեւս որոշ ուժերի դրդմամբ, ինտենսիվացել են խոսակցությունները, թե Հայաստանը չի նախաստորագրելու փաստաթուղթը, քանի որ գոյություն չունեցող, բայց շահարկվող Եվրասիական միության անհասկանալի Մաքսային միության կողմը կարող է հակվել:
Վիլնյուսյան բազմախոստում գագաթաժողովին ընդառաջ երեկ Հայաստանում նախագահի, վարչապետի, Ազգային անվտանգության խորհրդի քարտուղարի, արտգործնախարարի, էկոնոմիկայի, ֆինանսների, կրթության ու գիտության նախարարների, կուսակցությունների, քաղաքացիական հասարակության եւ մամուլի ներկայացուցիչների հետ հանդիպումներ է ունեցել ԵՄ ընդլայնման եւ Եվրոպական հարեւանության քաղաքականության հարցերով հանձնակատար Շտեֆան Ֆյուլեն:
Մինչ Հայաստան այցելությունը Ֆյուլեն եղել էր Վրաստանում` տարածաշրջանային այցից դուրս թողնելով Ադրբեջանը, որի հետ որեւէ փաստաթղթի թեկուզ նախաստորագրում չի նախատեսվում Վիլնյուսի գագաթաժողովի շրջանակներում:
Նախագահ Սերժ Սարգսյանի հետ հանդիպմանը, ըստ պաշտոնական հաղորդագրության, զրուցակիցները գոհունակությամբ են խոսել Հայաստան-ԵՄ հարաբերությունների, այդ հարաբերություններում առանցքային տեղ զբաղեցնող Արեւելյան գործընկերության շրջանակներում համագործակցության եւ Ասոցացման համաձայնագրի ու դրա մաս կազմող Խոր եւ համապարփակ ազատ առեւտրի գոտու բանակցությունների ընթացքի մասին:
Սարգսյանը եւ Ֆյուլեն գոհունակությամբ են նշել շարժունակության ոլորտում համագործակցության առաջընթացըՙ ընդգծելով, որ ստորագրվել եւ այժմ վավերացման փուլում են Վիզաների դյուրացման եւ Հետընդունման վերաբերյալ համաձայնագրերը: Ֆյուլեն խոսել է նաեւ Վիլնյուսի Արեւելյան գործընկերության գագաթաժողովի նախապատրաստական աշխատանքների մասին: «Հանրապետության նախագահն ընդգծել է, որ Հայաստանը հաստատակամ է շարունակելու եւ նոր թափ հաղորդելու մի շարք ուղղություններով երկրում իրականացվող լայնածավալ բարեփոխումներինՙ ակնկալելով դրանց իրագործմանը ցուցաբերվող աջակցության ընդլայնում», հայտարարել է Սերժ Սարգսյանը:
Վարչապետ Տիգրան Սարգսյանի հետ հանդիպմանը Ֆյուլեն նշել է, թե հետադարձ հայացք նետելովՙ կարելի է ասել, որ բավական մեծ ճանապարհ կա միասին անցած: Որպես հարաբերությունների զարգացման կարեւոր հանգրվան նա հիշատակել է 2013 թ. նոյեմբերին կայանալիք Վիլնյուսի գագաթաժողովը, որ, ըստ Ֆյուլեի, թույլ կտա որակական նոր մակարդակի բարձրացնել Արեւելյան գործընկերության երկրների հետ ԵՄ հարաբերությունները:
Վարչապետը նշել է, որ ԵՄ օժանդակությունը հնարավորություն է տալիս բարձրացնելու Հայաստանի կառավարության իրականացրած բարեփոխումների արդյունավետությունը եւ լրացնելու առկա կարողությունների բացը: Ֆյուլեն, իր հերթին, հավաստիացրել է, որ ԵՄ-ը շարունակելու է քայլեր ձեռնարկել Հայաստանին ֆինանսական աջակցություն ցուցաբերելու ուղղությամբ: Նա, մասնավորապես, հիշատակել է հավելյալ միջոցներ տրամադրելու հնարավորությունըՙ հաշվի առնելով Հայաստանի արձանագրած առաջընթացի բարձր ցուցանիշը:
Արտգործնախարար Էդվարդ Նալբանդյանի հետ զրույցում Ֆյուլեն բարձր է գնահատել ԵՄ-Հայաստան հարաբերություններում տեղի ունեցող դրական զարգացումները, ընդգծելով, որ Հայաստանն Արեւելյան գործընկերության ծրագրի առաջատար երկրներից է: Հանձնակատար Ֆյուլեն նաեւ հույս է հայտնել, որ նոյեմբերին կայանալիք Արեւելյան գործընկերության Վիլնյուսի գագաթաժողովին կնախաստորագրվեն Ասոցացման համաձայնագիրը եւ Խոր ու համապարփակ ազատ առեւտրի գոտու ստեղծման համաձայնագիրը:
Թեեւ Ֆյուլեն հույսով է Հայաստան եկել, ու խոսակցություններն էլ այդ հույսի դեմ շատ են պտտվում, սակայն Հայաստանի ղեկավարության հետ հանդիպումների հաղորդագրությունները վկայում են, որ նախաստորագրումը տեղի կունենա` որքան էլ ռուսամետ ու ռուսահայաց ուժերը «ջուր» պղտորելու փորձեր անեն:
