Դոնեցկի «Շախտյորը» երեկ պաշտոնապես հայտարարել է Հենրիխ Մխիթարյանի «Բորուսիա» տեղափոխության մասին, նշելով, որ գործարքը կազմել է 27,5 մլն եվրո: Ակումբի պաշտոնական կայքում թիմի ղեկավարությունը շնորհակալություն է հայտնել Հենրիխին եւ նրան հաջողություններ մաղթել:
Մխիթարյանը «Շախտյորում» հանդես էր գալիս 2010-ի օգոստոսի 30-ից: Այդ ընթացքում թիմի կազմում անցկացրած պաշտոնական 106 հանդիպումներում Մխիթարյանը 44 գոլ է խփել: Դրանցից 38-ը նա իր օգտին գրանցել է Ուկրաինայի առաջնություններում, 4-ը Ուկրաինայի գավաթի մրցաշարերում, 2-ըՙ չեմպիոնների լիգայի մրցաշարում:
Welt.de պարբերականը գրել է, որ Մխիթարյանը կդառնա «Բորուսիայի» արքայական տրանսֆերը. «Մխիթարյանը խնդիրներ չի ունենա մեկնարկային կազմում հայտնվելու առումովՙ դառնալով Մարիո Գյոտցեի արժանի փոխարինողը: Հենրիխը տեխնիկապես լավ է պատրաստված, ֆիզիկապես ամուր, արագ կիսապաշտպան է, որը լավ է տեսնում խաղադաշտը: Նա լավ տվյալներ ունի Սինձի Կագավային գերազանցելու համար, որը մեծ դեր ուներ «Բորուսիայում»: Մխիթարյանը սուր փոխանցումներ է կատարում եւ շատ արագ որոշումներ է կայացնում: Նա կդառնա թիմի արքայական տրանսֆերը»:
Մխիթարյանի տրանսֆերի շնորհիվ «Շախտյորը» ֆուտբոլիստների վաճառքից ստացված գումարի չափով հայտնվեց 2-րդ հորիզոնականում: Ֆեռնանդինյոյի եւ Մխիթարյանի վաճառքից ակումբը 67,5 մլն եվրո կստանա: Այս ցուցանիշով «Շախտյորը» զիջում է միայն «Պորտոյին»ՙ 70 մլն եվրո: «Բորուսիան» այդ ցուցակում 5-րդ տեղում էՙ 43,4 մլն եվրո:
