Ձայնագրման «Պոմեգրանիտ մյուզիք» մրցանակակիր ստուդիան վերջերս հրապարակ է հանել բրազիլահայ կլասիկ ժանրի կիթառահար Խոան Գույումջյանի ռաջին «Surfboard: Solo Guitar Works qrom Brazil» ալբոմը, որն ընդգրկում է Գույումջյանին նվիրված ստեղծագործություններ եւ գործիքավորումներ այնպիսի հայտնի երգահանների եւ արվեստագետների կողմից, ինչպիսիք են Ռայմոնդ Պենաֆորտը, Ռիկարդո Կալդերոնին, Կառլոս Բարբարա-Լիման, Անտոնիո Կառլոս Խոբիմը եւ Վիլլա-Լոբոսը:
«Փայլուն ալբոմ է, կենսուրախ եւ տարաբնույթ նրբերանգներով հագեցած, երաժշտական գոհարների հրաշալի հավաքածո էՙ կատարված ճաշակով եւ զգացմունքներով», նշել է կիթառի դասական վարպետներից Լորենցո Միշելին:
Գույումջյանը ծնվել է Սան Խոսե դո Ռիո Պրետոյում (Բրազիլիա): Հայրըՙ հայ է, մայրըՙ բրազիլուհի: Աշակերտել է մրցանակակիր, դասական կիթառիստ Շերոն Իզբինին: Մագիստրոսի աստիճան է ստացել Ջուլիարդ երաժշտանոցում, եւ առաջին տեղն է զբաղեցրել 2010-ին Սան Պաուլոյում կայացած «Սուզա Լիմա ազգային կիթառի 21-րդ մրցույթում»:
Գույումջյանը նվագել է Երեւանում ֆիլհարմոնիկ նվագախմբի հետ որպես հրավիրված մենակատար: Տարբեր առիթներով ելույթներ է ունեցել նաեւ Քառնեգի Հոլում, Քենեդի եւ Լինկոլն կենտրոններում, ինչպես նաեւ իր երկրի հեղինակավոր համերգադահլիճներում:
Նրա մասին դրական գնահատական է տպագրվել Մեծ Բրիտանիայում լույս տեսնող «Classical Guitar Magazine» պարբերականում:
«Surfboard» ալբոմի թողարկման աշխատանքները տեւել են շուրջ մեկ տարի: Ձայնագրությունները կատարվել են Աթենքում (Հունաստան), գեղարվեստական ձեւավորումըՙ Հայաստանում, հետարտադրական փուլըՙ Մ. Նահանգներում:
Ալբոմը հասանելի է «Amazon.com», «iTunes» եւ «CD bady.com» կայքերում:
