Մոտ 400 ղրիմցիներ կռվում են Սիրիայում
Բախչիսարայի շրջանի Պուտիլովո գյուղում վերջերս սպանվեց Անժելա Ստրելա անունով մի աղջնակ: Եվպատորիայի շրջանի Ույուտնոյե գյուղում գլխատվեց Արտյոմ անունով մի մանուկ; Նման դեպքեր այժմ հաճախ են պատահում: Կազակ ակտիվիստներից մեկը, որը Ղրիմի Գերագույն խորհրդի մշակույթի կոմիտեի նախկին խորհրդատու է, ՌԻԱ գործակալության թղթակցին հայտնել է, որ իսլամիստ արմատականները բաժան-բաժան են արել Ղրիմի թերակղզին: Օրինակՙ Ջանկոյի շրջանում գործում է թուրքական «Նուրջուլար» աղանդը, Բախչիսարայում բնավորվել են սալաֆիները եւ այլն:
Սիմֆերոպոլի կենտրոնում հանրահավաք է: Լսվում են «Ալլահ աքբար» բացականչություններ: Բազմաթիվ, նույնիսկ իսլամական, երկրներում արգելված «Հիզբ ութ-Թահրիր» կուսակցությունը ազատորեն գործում է Ուկրաինայում: Գլխավոր կարգախոսը «Համաշխարհային խալիֆայության» վերականգնումն է: Պաշտոնական իշխանությունները կողմնակի դիտորդի դերում են, իսկ կուսակցության կողմնակիցները սկզբում այսպես կոչված «շարիաթի ոստիկանության» պաշտպանության տակ են, իսկ հետո զենքով կեցվածք են ընդունում:
Վերջերս Սիմֆերոպոլի գլխավոր մզկիթ էր այցելել Լիբիայի Սահմանադրական դատարանի պատվիրակությունը: Այցելության նպատակը փորձի փոխանակումն էր: Թե ո՞ր փորձիՙ հայտնի չէ: Լիբիայի նոր իշխանություններն արդեն հայտարարել են, որ իրենք առանց Քադդաֆիի Լիբիա կկառուցեն շարիաթի օրենքներով
Ուկրաինայի ուժային կառույցների տվյալներովՙ Սիրիայում ապստամբների հետ կողք կողքի կռվում են մոտ 400 ղրիմցիներ: Նրանք վահաբականության եւ «Հիզբ ութ-Թահրիր» կուսակցության հետեւորդներ են: Բոլորն էլ Թուրքիայում պատրաստություն են անցել գրոհայինների ճամբարներում: Ոմանց հավաքագրել են հենց սիմֆերոպոլյան հանրահավաքի ժամանակ: Ինչպես «Հիզբ ութ-Թահրիրի», այնպես էլ վահաբականների նպատակը մահմեդականների միջավայրում արմատավորվելն է, իսկ ապագայում (երբ հրաման ստացվի)ՙ ապակայունացնող գործողությունների իրականացումը: Եվ առաջին հերթին թիրախ կդառնա ՌԴ սեւծովյան նավատորմը:
Ինչպես պարզվում է, իսլամիստ գործակալների համար Ղրիմ մուտք գործելը դժվար չէ: Եվ նույնիսկ Ուկրաինայի քաղաքացիություն ստանալն էլ դժվար չէ: Սիմֆերոպոլի Ժելեզնոդորոժնի շրջանի անձնագրային բաժնում Մերձավոր Արեւելքից եկածներին մի քանի հազար դոլարի դիմաց կապոցներով փաստաթղթեր էին տալիս:
Առողջարանային ավաններից մեկում հատուկ ջոկատները գրոհով ներխուժել են իսլամիստների որջը, այնտեղ գտնելով տրոտիլ եւ ծայրահեղական գրականություն: Վերջինս մասնավորապես այն մասին էր, թե ինչպես պետք է ջիհադՙ սրբազան պատերազմ մղել անհավատների դեմ: Դա իսլամիստների գաղտնի շտաբն էր: Հատուկ ծառայությունների տվյալներովՙ այնտեղ գրոհայիններ էին պատրաստվում:
Դեռ նախկին նախագահ Վիկտոր Յուշչենկոյի որոք Կիեւը «կանաչ լույս» վառեց ամեն տեսակի կրոնական հոսանքների առջեւ. ընտրություններում դրանց աջակցությունը եւ ազգային խաղաքարտի կիրառությունը անհրաժեշտ էին Ռուսաստանի ազդեցությունը կասեցնելու համար: Իսլամիստ արմատականները մինչեւ օրս օգտվում են այդ հնարավորությունից:
