Սպասվում է գործազրկության աճ
Եվրոգոտու 17 երկրների ֆինանսների նախարարները համաձայնել են Հունաստանին հերթական խոշոր վարկը տրամադրել ֆինանսական օգնության ծրագրի շրջանակներում: BBC-ն հաղորդում է, որ խոսքը 6,8 մլրդ եվրո գումարի մասին է: Բրյուսելում հայտարարվել է, որ 2,5 մլրդ եվրո կհատկացվի եվրոգոտու հատուկ արտակարգ հիմնադրամից, 1,5 մլն եվրոՙ Եվրոպայի Կենտրոնական բանկից: Մասնակցություն կունենա նաեւ Արժույթի միջազգային հիմնադրամը:
Վարկի 2,5 միլիարդանոց առաջին մասը ստանալու համար Հունաստանը պարտավոր է իրականացնել խնայողության ռեժիմի խստացմանն ուղղված բարեփոխումներ: Պետք է կրճատվեն մոտ 4 հազար պետծառայողներ, բյուջետային ոլորտի 25 հազար աշխատողների վարձատրությունը պետք է նվազեցվի:
Հերթական վարկը ստանալուց հետո Հունաստանը օգոստոսի կեսերին պարտավոր է 6,6 մլրդ եվրո վճարել իր նախկին պարտքերի դիմաց:
Հոկտեմբերին Հունաստանը կստանա եւս 1 մլրդ եվրո վարկ, որից հետո ԱՄՀ-ն կհատկացնի եւս 1,8 մլրդ եվրո:
Վարկատուները նախազգուշացնում են, որ բարեփոխումները հետ են մնում նախատեսված ժամկետներից: Օրինակ, հունիսին ձախողվեց Հունաստանի պետական գազային ընկերության սեփականաշնորհումը:
Բարեփոխումները հարուցում են հույների զանգվածային դժգոհությունը: Մոտ 25 հազար պետծառայողների սպառնում է կրճատում կամ պարտադիր վերապատրաստում: Դրա հետեւանքով է՛լ ավելի կաճի գործազրկությունը, որի մակարդակն արդեն իսկ հասնում է 27 տոկոսի:
Զանգվածային ցույցերն ու անկարգություններն ապակայունացնում են Հունաստանի քաղաքական իրավիճակը: Վերջին 4 տարում երկրում փոխվել է 4 կառավարություն:
