Վ. ՊՈՂՈՍՅԱՆ
Իվանիշվիլին ներկայացրել է իր տեսակետները, քանի դեռ նախագահի ընտրությունների միայն օրն է հայտնի
Վրաստանում նախագահի սպասվող ընտրություններից առաջ, որոնք արդեն իսկ կայացված որոշմամբ տեղի կունենան հոկտեմբերի 31-ին, Վրաստանի վարչապետ, միլիարդատեր Բիձինա Իվանիշվիլին իրավիճակային ինչ-որ հստակություն է փորձել մտցնել այն ամենի մեջ, ինչ վերաբերում է Վրաստանի ներքին եւ արտաքին քաղաքականությանը, միեւնույն ժամանակ անհստակ թողնելով առավել կարեւոր հարցերի պատասխանները:
Երեկ Իվանիշվիլին, ինչպես եւ խոստացել էր, մամուլի ընդարձակ ասուլիսի ընթացքում հայտարարել է, թե Վրաստանը Հայաստանի հետ կարգավորելու շատ հարցեր ունի: «Եվ դա չի վերաբերում միայն Ռուսաստանի հետ փոխհարաբերություններին, այլ մենք քննարկում ենք նաեւ մեր երկկողմ հարաբերություններին վերաբերող հարցեր», ասել է վրացի միլիարդատերըՙ արձագանքելով լրագրողներից մեկի` վերջին շրջանում Վրաստանի կառավարության անդամների Երեւան հաճախակիացած այցելությունների մասին հարցին:
Որ հայ-վրացական հարաբերություններում կարգավորման կարիք ունեցող շատ հարցեր կան, Իվանիշվիլու մտքի թռիչքի արդյունքը չէ, սակայն Երեւան հաճախակիացած այցելություններն էլ միշտ չէ, որ կապված են հենց երկկողմ հարաբերություններում առկա խութերի հետ: Թեեւ Ռուսաստանի հետ փոխհարաբերության նշումը հայ-վրացական համատեքստում կարելի է դրականորեն մեկնաբանել, չնայած Իվանիշվիլին հայտարարել է նաեւ, թե «Ռուսաստանն այսօր Վրաստանի համար ամենածանր եւ հետաքրքրական հարցն է»:
Վրաստանի վարչապետի տեղեկացմամբՙ կոնկրետ քայլեր արվում են, թեեւ կա մտահոգություն «այսպես կոչված սահմանների» հետ տեղի ունեցողի մասով: «Հաջորդ քայլերի առնչությամբ ասեմ, որ հրաշքների չեմ սպասում: Չեմ սպասում, որ վաղը կամ մյուս օրը մենք կվերականգնենք տարածքային ամբողջականությունը, եւ որ դա Ռուսաստանն է որոշելու»:
Իվանիշվիլու մեկնաբանությամբ, «բնական է, որ Ռուսաստանը մեծ դեր ունի, բայց մենք, էլ պակաս, եթե ոչ ավել դեր չունենք»: «ՄԵնք պետք է մտածենք ոչ թե տարածքները վերադարձնելու, այլ այն մասին, թե ինչպես համոզենք մեր եղբայր աբխազներին ու օսերին, որ մեր համատեղ կյանքը ավելի լավ է, քան այն, ինչ տեղի է ունենում այսօր», ասել է Վրաստանի վարչապետըՙ այդ համատեքստում կարեւորելով տնտեսության դերը այն մոտեցմամբ, որ հարկավոր է Վրաստանը հետաքրքրական դարձնել նախ հենց վրացիների համար, ապաՙ նաեւ աբխազների եւ օսերի:
Վրաց-ռուսական հարաբերությունների հետագա զարգացումը Իվանիշվիլին տեսնում է, որ նախ կերականգնվեն Թբիլիսի-Մոսկվա չվերթերը, վիզային ռեժիմի հարցը կլուծվի, 2014-ի Սոչիի օլիմպիադային էլ Վրաստանը հնարավոր աջակցություն կտրամադրի` խաղաղ անցկացնելու համար, ինչը մեծագույն կարեւորություն ունի Ռուսաստանի համար: Եվ սա այն պարագայում, որ նույն Իվանիշվիլու համոզմամբ Վրաստանը ներկա փուլում զենք ձեռք բերելու կարիք չունի, ասել է թե արկածախնդրության չի գնալու:
Հայաստանի հետ կարգավորման հարցեր ունենալու համատեքստում հետաքրքրական է նաեւ, որ Իվանիշվիլին վերահատսատել է իր կառավարության կողմից աբխազական երկաթուղու վերագործարկման առնչությամբ պատրաստակամությունը:
«Աբխազիայով անցնող երկաթուղային հաղորդակցությունը անպայման կվերականգնվի, բայց դրա համար ժամանակ է անհրաժեշտ», «Գրուզիա օնլայն» կայքէջի փոխանցմամբ` հայտարարել է Իվանիշվիլին: Ըստ նրա, այդ երկաթուղին անհրաժեշտ է ինչպես Վրաստանի տնտեսական զարգացման, այնպես էլ աբխազների հետ հարաբերությունների կարգավորման համար:
«Ինչքան շատ ճանապարհ, այդքան մեծ հնարավորություններ զարգացման համար. սա աքսիոմա է», ասել է Վրաստանի վարչապետը: Իսկ թե ինչու սայլը տեղից չի շարժվում, Իվանիշվիլին նշել է, որ ներկա փուլում խնդիրներ են առաջացել, քանի որ հարցը շատ քաղաքականացված է. «Առաջին հերթին, մենք մեր ժողովրդին պետք է բացատրեինք այդ ճանապարհի վերականգնման անհրաժեշտությունը, ըստ իս, դա մեզ հաջողվեց, եւ մենք կսկսենք շարժվել այդ ուղղությամբ»:
Մեկ այլ հարց, որ անմիջապես առնչվում է հայերին, վերաբերում է կրոնական փոքրամասնությունների իրավունքներին, որոնք հարգելու խոստում է տվել Իվանիշվիլին` անդրադառնալով Սամթացկարո գյուղի ուղղափառների կողմից մուսուլմաններին աղոթք անելն արգելելու դեպքերին: Տվյալ դեպքում այնքան կարեւոր չէ կոնկրետ միջադեպը, որքան այն, որ Իվանիշվիլին օրենքը պաշտպանելու համատեքստում հայտարարել է, որ վրացական իշխանությունները խիստ կլինեն ու կպաշտպանեն բոլոր կրոնական փոքրամասնությունների իրավունքները:
Մնացյալ հարցերից, որոնց պատասխանել է Իվանիշվիլին, նշենք, որ, ըստ վարչապետի, ՆԱՏՕ-ին Վրաստանի ինտեգրումը կարագացվի, վարչապետը քաղաքականությունից, այդուամենայնիվ, կհեռանա, թեեւ երկրից չի հեռանալու, քանի դեռ պատասխան չի տվել բոլոր հարցերին:
