Շրջանային արվեստների եւ մշակույթի «Փեյնթ կրիք» կենտրոնի 3-րդ տարեկան մրցանակաբաշխությունը տեղի է ունեցել Ռոչեստրի (Միչիգան) «Ռոյալ պարկ» հյուրանոցում հունիսի 13-ինՙ հոծ բազմության ներկայությամբ, տեղեկացնում է «Արմինյըն միրոր սփեքթեյթըր» շաբաթաթերթը:
Մրցանակներ շնորհող այս ծրագիրը սկսել է գործել 1982-ից արվեստի տարբեր բնագավառներումՙ ստեղծագործական աշխատանքները խթանելու նպատակով: Այս տարվա մրցանակներին արժանացել է ութ արվեստագետ, որոնցից մեկը եղել է Տրոյ քաղաքը (Միչիգան) ներկայացնող հայազգի Զաբել Բելյանը, սեփականատերը եւ տնօրենը «Բելյան արվեստի կենտրոնի», որը երկար տարիներ երիտասարդ արվեստագետներին խրախուսելու վայր է հանդիսացել: Իր ամուսնուՙ դոկտ. Կարապետ Բելյանի հետ, Զաբելը նշանակալի ներդրում է ունեցել քաղաքի մշակութային կյանքի զարգացման գործում: Ինքն էլ կայացած նկարչուհի: Նրա ջրաներկ ու յուղաներկ բնանկարները եւ կերամիկական ստեղծագործությունները հիացրել են շատերին:
Հանդիսության ընթացքում ցուցադրվել են կարճամետրաժ տեսահոլովակներ ութ արվեստագետների անցած ստեղծագործական կյանքի մասին: Դրան անմիջապես հետեւել է հյուրասիրությունը, որը վարել է «Դետրոյթ նյուզ» թերթի արվեստի բաժնի պատասխանատու Մայքլ Հոդջեսը: Ներկա է եղել նաեւ քաղաքապետ Դեյն Սլեյտերը:
