Իսկ գործարքների քանակը նվազել է
Անշարժ գույքի կադաստրի պետական կոմիտեիՙ շուկայի վերլուծության տվյալների համաձայն, 2013-ի մայիսին, Հայաստանի անշարժ գույքի շուկայում իրականացվել է 14235 գործարք, ինչը 10 տոկոսով ցածր է նախորդ ամսվաՙ ապրիլի եւ 2,1 տոկոսով բարձրՙ 2012-ի մայիսի գործարքների համեմատ: Հիշեցնենք, որ փետրվարին եւ մարտին գործարքների քանակի զգալի աճ էր արձանագրվել: Սակայն ապրիլին, հիմա նաեւ մայիսին գործարքների քանակը նվազել է:
Օտարման գործարքների քանակը մայիսին ապրիլին համեմատ նվազել է 20,4 տոկոսով, իսկ անցյալ տարվա մայիսի համեմատ աճելՙ 10,2 տոկոսով: 3191 օտարման գործարքներից առուվաճառքներինը կազմել է 75,2 տոկոսը: Մնացածը նվիրատվություններն ու փոխանակություններն են: Անշարժ գույքի օտարման գործարքների քանակի 36,5 տոկոսն արձանագրվել է Երեւան քաղաքում, իսկ առուվաճառքի գործարքների 58,9 տոկոսն արձանագրվել է բազմաբնակարան շենքերի բնակարանների նկատմամբ: 2013-ի ապրիլի համեմատ, մայիսին բնակարանների առուվաճառքի գործարքների քանակը Երեւանում նվազել է 31,5 տոկոսով, իսկ նախորդ տարվա մայիսի համեմատՙ 10,2 տոկոսով:
Բնակարանների շուկայական միջին գները Երեւանում այս տարվա մայիսին ապրիլի համեմատ չնչին չափով աճել ենՙ 0,2 տոկոսով: Ըստ վարչական շրջանների, Երեւանում բնակարանների 1 քմ մակերեսի միջին շուկայական գները այսպիսին են եղել.
| Վարչական շրջաններ | Միջին գները (դրամ) մայիս 2012 թ. | Միջին գները (դրամ) մայիս 2013 թ. | Միջին գները (դրամ) ապրիլ 2013 թ. |
| Կենտրոն | 412000 | 428000 | 428000 |
| Արաբկիր | 339100 | 355500 | 355500 |
| Քանաքեռ-Զեյթուն | 266100 | 282300 | 282200 |
| Նոր Նորք | 228400 | 251000 | 250000 |
| Ավան | 238050 | 259100 | 258050 |
| Էրեբունի | 236050 | 248500 | 248200 |
| Շենգավիթ | 235100 | 254250 | 254000 |
| Դավթաշեն | 260000 | 274200 | 273500 |
| Աջափնյակ | 227000 | 247200 | 246500 |
| Մալաթիա-Սեբաստիա | 226000 | 239000 | 238550 |
| Նուբարաշեն | 140200 | 151000 | 151000 |
| Միջինը Երեւանում (բացի Նորք-Մարաշից) | 255300 | 271900 | 271400 |
Մարզերում, բացառությամբ Երեւանի, մայիսին վաճառվել են 322 բնակարաններ, որոնց քանակը ապրիլի համեմատ նվազել է 2,7 տոկոսով, իսկ 2012-ի մայիսի համեմատ աճելՙ 13 տոկոսով: Գներն այստեղ մայիսին գրեթե չեն փոխվել:
Երեւանից հետո, ամենաթանկ բնակարանները մայիսին եղել են Ծաղկաձորում, որտեղ 1 քմ մակերեսի շուկայական գինը կազմել է 292 հազար դրամ: Աբովյանում 1 քմ գինը 155 հազար հազար դրամ է կազմել, Վաղարշապատում (Էջմիածնում)` 154 հազար դրամ, Նոր Հաճընում` 128 հազար դրամ, Եղեգնաձորում` 123 հազար դրամ, Արմավիրում եւ Գորիսում ` 121 հազար դրամ, Իջեւանում 118 հազար դրամ 1 քմ դիմաց ցուցանիշներով:
2013-ի մայիսին Հայաստանում գրանցվել է անհատական տների առուվաճառքի 332 գործարք, որից 83-ըՙ Երեւանում: Մայրաքաղաքում անհատական տների առուվաճառքի գործարքների քանակը 2013-ի ապրիլի համեմատ նվազել է 4,6 տոկոսով, իսկ մարզերում միասին աճել` 23,1 տոկոսով: 2012-ի մայիսի համեմատ անհատական բնակելի տների առուվաճառքի գործարքների քանակը Երեւանում նվազել է 32 տոկոսով, իսկ մարզերում միասին վերցրած` 5,7 տոկոսով:
Միջինացված 250 քմ շինության մակերես եւ 400 քմ տնամերձ ունեցող անհատական տների 1 քմ-ի միջին գները (ներառյալ տնամերձի միավորի գինը) 2012-ի մայիսին ապրիլի համեմատ Երեւանում մնացել են անփոփոխ: Ըստ Երեւանի վարչական շրջանների, գների պատկերը հետեւյալն է եղել.
| Վարչական շրջաններ | Միջին գները (դրամ) մայիս 2012 թ. | Միջին գները (դրամ) մայիս 2013 թ. | Միջին գները (դրամ) ապրիլ 2013 թ. |
| Կենտրոն | 461500 | 476100 | 476100 |
| Արաբկիր | 366900 | 383000 | 383000 |
| Քանաքեռ-Զեյթուն | 278900 | 295000 | 295000 |
| Նորք-Մարաշ | 305500 | 319200 | 319200 |
| Ավան | 258900 | 270500 | 270500 |
| Էրեբունի | 227800 | 239500 | 239500 |
| Շենգավիթ | 244500 | 255000 | 255000 |
| Դավթաշեն | 262800 | 276000 | 276000 |
| Աջափնյակ | 237800 | 250050 | 250050 |
| Մալաթիա-Սեբաստիա | 226100 | 238000 | 238000 |
| Նուբարաշեն | 144500 | 150500 | 150500 |
| Միջինը Երեւանում (բացի Նոր Նորքից) | 274100 | 286600 | 286600 |
Մարզերում միջինացված են 200 քմ շինության եւ 1000 քմ տնամերձ մակերեսով անհատական տների վերաբերյալ գները: Այստեղ միջին գները մայիսին ապրիլի համեմատ գրեթե անփոփոխ են: Ամենաթանկ անհատական տները Երեւանից հետո Ծաղկաձորում ենՙ 1 քմ-ն 305 հազար դրամ: Երկրորդը Աբովյանն է 1 քմ-ն 157 հազար դրամ, երրորդը Վաղարշապատը, որտեղ 1 քմ-ն կազմել է 153 հազար դրամ: Ապա գալիս են Աշտարակըՙ 136 հազար դրամ, Ջերմուկը` 131 հազար դրամ, Գորիսը` 130 հազար դրամ, Նոր Հաճընը` 129 հազար դրամ, Իջեւանըՙ 123 հազար դրամ, Բյուրեղավանը` 120 հազար դրամ 1 քմ դիմաց:
Հողի շուկայում հետեւյալ պատկերն էՙ 2013-ի մայիսին 2012-ի մայիսի համեմատ, հողերի առուվաճառքի գործարքների քանակը նվազել է 7,4 տոկոսով, աճուրդով վաճառքներինը` 3 տոկոսով:
2013-ի մայիսին 2013-ի ապրիլի համեմատ, անշարժ գույքի վարձակալության գործարքների քանակը նվազել է 24,3 տոկոսով, իսկ 2012-ի մայիսի համեմատ` 21,8 տոկոսով:
Մայիսին իրականացվել են հիփոթեքային գրավադրման 137 գործարքներ, որից 81-ը` Երեւանում: Ապրիլի համեմատ, հիփոթեքային գրավադրման գործարքների քանակը Երեւանում նվազել է 32,5 տոկոսով, իսկ մարզերում աճել` 36,6 տոկոսով: 2012-ի մայիսի համեմատ, հիփոթեքային գրավադրման գործարքների քանակը Երեւանում նվազել է 19 տոկոսով, իսկ մարզերում` աճել 40 տոկոսով:
Այսպիսով, անշարժ գույքի շուկայում մայիսին գործարքների քանակը նվազել է, իսկ գները` մնացել անփոփոխ: Հիշեցնենք, որ այս տարվա փետրվար, մարտին գործարքների քանակի կտրուկ աճ էր արձանագրվել եւ թվում էր, թե անշարժ գույքի շուկայի աշխուժացման միտում է սկսվել: Սակայն ապրիլին եւ մայիսին արձագարվեց հակառակ երեւույթը` գործարքների քանակը նվազեց: Ինչ վերաբերվում է գներին, ապա դրանք մնում են առանց էական փոփոխությունների:
