ՄԱԿ-ի Ընդհանուր ժողովի 1987 թվականի դեկտեմբերի 7-ի որոշմամբ ամեն տարի հունիսի 26-ը նշվում է որպես թմրամիջոցների չարաշահման եւ դրանց ապօրինի շրջանառության դեմ պայքարի միջազգային օր:
Առողջապահության նախարարությունը տեղեկացնում է, որ այս տարվա համար կարգախոս էր ընտրվելՙ «Թող քո նոր թմրամիջոցը դառնա առողջ ապրելակերպը»:
Նախարարությունը վստահեցնում է, որ կշարունակի առավել հաստատակամությամբ զբաղվել թմրամոլության կանխարգելման, թմրամոլությամբ հիվանդ մարդկանց հասանելի եւ որակյալ բժշկական ծառայություններ տրամադրելու եւ թմրամոլության հասցրած վնասները նվազեցնելու գործով:
Հայաստանի առողջապահական համակարգի նարկոլոգիական ծառայության կողմից ներկայումս հաշվառված է 4332 թմրամոլ: Հաշվառվածների գերակշիռ մասը 28-49 տարեկան են:
Երեկ թմրամոլության դեմ պայքարի թեմայով կազմակերպված ասուլիսի ժամանակ հոգեբան Սամվել Խուդոյանը նշեց, որ թմրամոլություն կա նաեւ դեռահասների շրջանում: Դեռահասները թմրամոլության են դիմում` ընկնելով միջավայրի ազդեցության տակ ու ձգտելով նմանվել քրեական հեղինակություններին: Բայց, ընդանուր առմամբ, թմրամոլության հիմնական պատճառը, ըստ հոգեբանի, հաճույքից մեծ կախվածություն ունենալն է: Իսկ բուժման արդյունավետությունը կախված է ամեն անձի կենսաբանական ու հոգեբանական առանձնահատկություններից:
Հոգեբանն ասում է` կարեւոր է, որ թմրամիջոցներից կախվածության դեմ օրգանիզմը պայքարի ոչ միայն դեղորայքի միջոցով, այլեւ հոգեբանորեն ու կամքի մեծ ուժ ցուցաբերելով: Հետեւաբար, կենսաբանական բուժումից բացի, թմրանյութերից կախվածություն ունեցող հիվանդները պետք է ստանան հոգեթերապեւտիկ բուժում:
