«Ազգ» օրաթերթի հունիսի 7-ի համարում տպագրված «Օրինագծեր, որոնք դեմ են հայկական ընտանիքին» հոդվածին ուղղված ստացել ենք նամակ-արձագանք «Արեգ» գիտավերլուծական կենտրոնից:
Նամակում ասվում է, որ կանանց ու տղամարդկանց հավասար իրավունքների ու հնարավորությունների մասին օրինագծի առնչությամբ ԵՊՀ աստվածաբանության ֆակուլտետի դոցենտ Վարդան Խաչատրյանն ահազանգել է օրինագծի 3-րդ հոդվածում «գենդեր» եզրույթի նորօրյա սահմանման մասին, ըստ որի, գենդերը մասնավորապես «ձեռքբերովի, սոցիալապես ամրագրված վարքն է»:
Այսպիսով, հիմնավորվում է մարդու իրավունքների պաշտպանի աշխատակազմի կողմից «Խտրականության դեմ» նախագծում կենսաբանական սեռի տարանջատումը գենդերից` որպես սոցիալական սեռի:
Ավելին` կանանց եւ տղամարդկանց հավասար իրավունքների եւ հավասար հնարավորությունների ապահովման մասին երրորդ ընթերցումն անցած օրինագծի 8-րդ հոդվածում պարտավորություն է ստանձնվում «գենդերային հավասարության հիմնախնդիրների վերաբերյալ միջազգային իրավունքի սկզբունքների եւ նորմերի» կատարման եւ «գենդերային հավասարության ապահովման համար նորմատիվ իրավական բազայի» ձեւավորման, կատարելագործման, զարգացման եւ միջազգային իրավունքի սկզբունքներին եւ նորմերին համապատասխանեցման մասին:
«Մեր խորին մտահոգությունը կապված է ավանդական-հոգեւոր արժեհամակարգին անհարիր, անհատի կենսաբանական սեռից տարբեր «գենդերային ինքնության» ձեռքբերովի վարքի «սոցիալապես ամրագրմանը»: Իսկ դա, ինչպես Արեւմուտքում, ճանապարհ է բացում նույնասեռ մի քանի անձանց «ընտանիք» կազմելու, նրանցում երեխաների` բարոյական կործանմանը տանող «որդեգրման»… եւ մարդկային տեսակի բնաջնջման համար», ասվում է նամակում:
