Ընթերցանության ճգնաժամի մակարդակը գնահատելու եւ իրավիճակն ուսումնասիրելու նպատակով «Սենսեյ» մարկետինգ ակադեմիան հետազոտություն է անցկացրելՙ պարզելու ընթերցանության ոլորտի հիմնախնդիրները:
Համաձայն ուսումնասիրությունների արդյունքներիՙ Հայաստանի բնակչության 37%-ն ընդհանրապես գիրք չի կարդում, իսկ հարցվածների 44%-ը պատասխանել է, որ վերջին 5 տարում սկսել է ավելի քիչ կարդալ: Պարզվել է, որ ավելի քիչ կարդացող խմբի 70%-ն ամուսնացածներն են: «Ի՞նչն է խանգարում ձեզ գիրք կարդալ» հարցին հարցվածների մեծամասնությունը պատասխանել էՙ ժամանակ չկա: Ընթերցանության հիմնական տարիքը միջին դպրոցականն էՙ 10-16 տարեկան: Վերջին 5 տարիների ընթացքում ավելի շատ է սկսել կարդալ բնակչության 14%-ը: Նրանց մեծամասնությունը գիրք կարդում է ելնելով ուսումնական հաստատությունների տված պահանջներից: Հենց դա է պատճառը, որ ընթերցողների մեծամասնությունն ուսանողներն ենՙ 64%-ը իգական սեռի ներկայացուցիչներ: Հարցվածներից միայն 6%-ն է գրքերի մասին տեղեկատվություն ձեռք բերում գրախանութներից, իսկ 67%-ը չի հաճախում գրադարաններ: «Հաճույքի համա՞ր եք կարդում» հարցին բնակչության 52,4 %-ը դրական պատասխան է տվել, 43,5%-ը խոստովանել է, որ գիրք կարդում է ինքնակրթության համար, իսկ մնացածըՙ մասնագիտական գիտելիքներ ձեռք բերելու:
Պարզվել է, որ հարցվածների 87%-ը կարդում է դասական արձակ ստեղծագործությունՙ մասնավորապես հայերենով: Երկրորդ ամենաշատ ընթերցվող լեզուն ռուսերենն է: Թեպետ վերջին շրջանում ավելացել են էլեկտրոնային գրքեր ընթերցողները, այնուամենայնիվ 78%-ը նախընտրում է կարդալ տպագիր:
