Հայաստանի ֆուտբոլային հմուտ մասնագետներից մեկըՙ Սուրեն Բարսեղյանն այսօր կմեկնի Բեյրութ, որտեղ բանակցություններ կվարի տեղական «Սաֆա» թիմի հետ: Վերջինս Բարսեղյանին հրավիրել է գլխավորելու թիմը:
Սուրեն Բարսեղյանը վերջերս ստանձնել էր նորաստեղծ «Ուրարտուի» գլխավոր մարզչի պաշտոնըՙ փոխարինելով «Ալաշկերտ» տեղափոխված Արմեն Սանամյանին: Սակայն «Ուրարտուի» ՀՀ առաջնության առաջին խմբի մրցաշարին մասնակցելու հարցը դեռեւս պարզ չէ: ՀՖՖ-ն 80 մլն դրամ երաշխիքային գումար է պահանջում ակումբից: «Ուրարտուի» գլխավոր մարզչի պաշտոնակատար է նշանակվել Սամվել Պողոսյանը, որը մինչ այդ գլխավորում էր «Իմպուլս-2-ը»:
Սուրեն Բարսեղյանը Լիբանանում աշխատելու մեծ փորձ ունի: Նա ժամանակին գլխավորել է լիբանանյան մի շարք թիմեր: 1997-ին նա «Սաֆայի» գլխավոր մարզիչն էր:
