ԱՄՆ-ի ծավալած համացանցային լրտեսումը եւ գաղտնալսումները լուրջ անհանգստություն են պատճառում Եվրոմիության երկրներին, որոնք վերջերս խոսում են ամերիկյան «մեծ ականջների» մասին: «Ֆիգարո» թերթն արձանագրում է, որ ԱՄՆ Անվտանգության ազգային գործակալությունը (ԱԱԳ) կարող է հետեւել եվրոպացիների բոլոր քայլերին ու շարժումներին:
ԵՄ արդարադատության եւ հիմնարար իրավունքների հանձնակատար Վիվիան Ռեդինգը համապատասխան նամակով արդեն իր մտահոգությունն է հայտնել ԱՄՆ արդարադատության նախարար Էրիկ Հոլդերին: Հարցերը շատ են. ամերիկացինե՞րն են, թե՞ օտարները, ինչպիսի՞ն է լրտեսման ցանցի ընդգրկումը, որո՞նք են կալանման ու գաղտնալսման չափանիշները եւ այլն: Նամակի վերջում Ռեդինգը գրել է. «Հիմնարար իրավունքների հարգումը ԵՄ-ԱՄՆ հարաբերությունների հիմքն է, եւ հավանաբար Եվրոխորհրդարանը կգնահատի անդրատլանտյան կապերը Ձեր պատասխանների լույսով»:
Որ Microsoft-ի, Google-ի, Yahoo!-ի, Facebook-ի, YouTube-ի, Skype-ի, AOL-ի եւ Apple-ի որոնողական համակարգերը, սերվերները եւ էլեկտրոնային փոստը վերահսկվում եւ գաղտնալսվում են ամերիկյան հատուկ ծառայություններում, զարմանալի չէ, քանիզի ամերիկյան այդ խոշոր ընկերությունների սերվերները գտնվում են հենց ԱՄՆ-ում: Սակայն առավել մտահոգիչ է այն, որ ամերիկացիները, ասես ճակատագրի հեգնանքով, եվրոպացիների մասնավոր կյանքի մեջ են ներխուժել Եվրոխորհրդարանի մերժումներին հակառակ: Օրինակ, այս տարի Եվրոխորհրդարանը հրաժարվել էր ամերիկացիների տրամադրել ԱՄՆ թռչող ԵՄ քաղաքացիների բանկային տվյալները: Չնայած դրան, «Ֆայնենշըլ թայմս» թերթը պարզել է, որ անցյալ տարի Օբամայի վարչակազմին հաջողվել է ԵՄ-ին համոզել քաղաքացիների անձնական տվյալները պաշտպանող օրենսդրությունից սուսուփուս հանելու մի տեխնիկական կետ, որը թերեւս կսահմանափակեր եվրոպացիների գաղտնալսումները Ամերիկայում:
