Ղարաբաղյան հակամարտության վերաբերյալ ԱՄՆ, Ֆրանսիայի եւ ՌԴ նախագահների հայտարարությանը երեկ անդրադարձել է Ադրբեջանի ԱԳՆ խոսնակ Էլման Աբդուլլաեւը եւ արել սենսացիոն հայտարարություն: Ըստ Աբդուլլաեւիՙ «ԵԱՀԿ Մինսկի խմբի համանախագահ երկրների հայտարարության մեջ արտացոլված է Ադրբեջանի դիրքորոշումը» (տես http://news.day.az/politics/409414.html):
Ընդսմին, նա բավական «օրիգինալ» ձեւով է «վերաշարադրել» հայտարարությունը` նկատել տալով, որ «համանախագահ երկրների նախագահները միանգամայն ճիշտ են ընդգծել, որ ռազմական ուժի կիրառումը դառնում է դիմակայության եւ անկայունության առաջացման պատճառ, դրա վերացման համար ադրբեջանական հողերը պետք է վերադարձվեն եւ Հայաստանի զինված ուժերը պետք է թողնեն Ադրբեջանի «օկուպացված տարածքները» (չակերտները մերն են- Վ. Ա.), Հայաստանը խախտել է ուժի չկիրառման սկզբունքը, որի արդյունքը ադրբեջանական հողերի օկուպացիան է»:
Այս «մեկնաբանությունը» թույլ է տալիս եզրակացնել, որ Բաքվում ԱՄՆ, Ֆրանսիայի եւ ՌԴ նախագահների համատեղ հայտարարությունից, մեղմ ասած, ոգեւորված չեն: Այլապես, նախ կարծիք կարտահայտեր ԱԳ նախարարը, երկրորդ` արտգործնախարարության խոսնակը վերագրումներ թույլ չէր տա ԵԱՀԿ Մինսկի խմբի համանախագահ երկրների առաջնորդների հասցեին:
Իրավիճակի «նրբությունը» նկատել է նաեւ ադրբեջանական մամուլը: Haqqin.az-ը, մասնավորապես, թեմային իր անդրադարձը վերնագրել է «ԱԳՆ-ն մի բան է ասում, իշխող կուսակցությունը` այլ բան»: Ավելի ծավալուն ներկայացնելով ԱԳՆ խոսնակի «մեկնաբանությունները», լրատվամիջոցն այնուհետեւ ներկայացրել է «Ենի Ազարբայջան» կուսակցության գործադիր քարտուղար եւ Միլլի մեջլիսի պատգամավոր Ալի Ահմեդովի արձագանքը, որտեղ վերջինս խիստ ձեւակերպումներ է արել ԵԱՀԿ Մինսկի խմբի հասցեին, որ «20 տարի է` չի կարողանում լուծել հարցը, թեեւ ստանձնել է նման պարտավորություն»:
Ահմեդովը նաեւ անուղղակի մեղադրանք է ներկայացրել ԱՄՆ, Ֆրանսիայի եւ ՌԴ նախագահներին` ակնարկելով, որ «հայտարարությունը պետք է պարունակի առավել կոնկրետություն»: Հավանաբար Ադրբեջանում իշխող կուսակցությունը կուզենար, որ Օբաման, Օլանդը եւ Պուտինը Իլհամ Ալիեւին անվանեին «հիմար» կամ «անհասկացող»:
Այլապես ի՞նչ «կոնկրետություն» է ուզում Ալի Ահմեդովը, եթե երեք նախագահների համատեղ հայտարարության մեջ հստակ ասված է, որ հակամարտության բոլոր կողմերի առաջնորդները պետք է վերահաստատեն իրենց հավատարմությունը Հելսինկյան սկզբունքներին, այն է` ուժի կամ սպառնալիքի չկիրառում, տարածքային ամբողջականություն եւ ժողովուրդների իրավահավասարություն եւ ինքնորոշման իրավունք
Ընդ որում, նաեւ ասված է, որ այդ սկզբունքները պետք է դիտել որպես մեկ ամբողջություն, դրանցից մեկին նախապատվություն տալը չի բերի հավասարակշռված որոշումների ընդունման: Ավելի կոնկրետ ի՞նչ կարելի է ասել: Գուցե թե միայն մի բան` որ Լեռնային Ղարաբաղի անկախությունը որեւէ կապ չունի Ադրբեջանի տարածքային ամբողջականության «վերականգնման» հետ: Բայց այդ դեպքում դիվանագիտական պատշաճությունը խախտած կլիներ: Երեք նախագահների համատեղ հայտարարությունը նախապատրաստում եւ համաձայնեցնում են շատ ավելի փորձառու եւ իրենց մանագիտությունը հարգող մարդիկ, քան Ադրբեջանի ԱԳՆ խոսնակն է կամ իշխող կուսակցության գործադիր քարտուղարը:
