ՀԱՅԿԱԿԱՆ ԿՈՆՅԱԿԻՆ ՆՎԻՐՎԱԾ ՆԱՄԱԿԱՆԻՇ
Մարվել եւ շրջանառության մեջ է դրվել Հայաստանում կոնյակագործության հիմնադրմանը նվիրված նամականիշ: Մարման արարողությանը ներկա էին ՀՀ տրանսպորտի եւ կապի փոխնախարար Անդրանիկ Ալեքսանյանը, «Հայփոստ» ՓԲԸ գլխավոր տնօրենի պաշտոնակատար Հայկ Ավագյանը, պաշտոնատար այլ անձինք, հյուրեր:
Նամականիշի վրա պատկերված են կոնյակով լի բաժակ, խաղողով զամբյուղ եւ հին քանդակ, որին պատկերված են թագավորական զգեստով երկու տղամարդ` խմիչքի գավաթները ձեռքներին:
Նամականիշի հեղինակն է Վահագն Մկրտչյանը: 300 դրամ անվանագին ունեցող այս նամականիշը տպագրվել է Ֆրանսիայի Կարտոր (Cartor) տպարանումՙ 40 000 տպաքանակով:
Սա հայկական խմիչքներին նվիրված ավանդական շարքի շարունակությունն է. 2001թ. արդեն թողարկվել է նամականիշ` նվիրված գարեջրագործությանը, իսկ այս տարի թողարկվելու է նամականիշ` նվիրված հայկական գինեգործությանը:
Հայաստանում կոնյակի արտադրությունը հիմնադրվել է 1887թ., եւ լավագույն ավանդույթներով շարունակվում է մինչ օրս:
«Հայփոստ թրասթ մենեջմենթ» Բ.Վ.-ն եւ «Հայփոստ» ՓԲԸ-ն շարունակում են հայկական ֆիլատելիայի զարգացման քաղաքականությունը:
