Վ. Պ.
Հաճախ են հայաստանցիները որոշ ոլորտներ ու հանգամանքներ ոչ թե Ադրբեջանի հետ համեմատում, որ բյուջեի ծախսերի առումով նավթային միջոցներ է սպառում, այլՙ Վրաստանի հետ, որտեղ հանրության զգալի հատվածին առնչվող շատ փոփոխություններ միանգամից ընկալվում են որպես մի բան, ինչ Հայաստանում հնարավոր չէ. օրինակ` ճանապարհային ոստիկանության «մաքրազերծումը»:
Թե իրականում որ գործընթացներն ինչ ընթացք են ունեցել եւ ունեն Վրաստանում, այլ հարց է. տվյալ դեպքում կարեւոր է, որ հասարակության լայն զանգվածների առումով տեսանելի են փոփոխություններ, շատ դեպքերում` դրական: Մինչդեռ Հայաստանում ոչ փոփոխություններ են երեւում, ոչ էլ անգամ դրանց իրագործման մտադրությունն է հստակ:
Ինչեւէ, ռուս-վրացական հարաբերություններում բեկում նկատելու հիմքերը շատանում են, մի քիչ էլ ավելացնելով Վրաստանին նախանձելու հիմքերը: Մասնավորապես, վրացական գինին արդեն իսկ հայտնվել է ռուսաստանյան շուկայում, ու որոշ հրապարակումների համաձայն, ոչ միայն ուրախացրել ռուս սպառողին, այլեւ տխրեցրել հայ գինեգործներին: Սակայն տվյալ դեպքում տխրություն ասվածը բավականին հայավարի է, քանի որ առողջ մրցակցելու ընդունակները ոչ թե մտահոգություն են արտահայտում, այլ պատրաստվում են մրցակցության:
Հիմա էլ մեկ այլ նախանձի թեմա է բացվելու հայերի համար, այս անգամ` օդային փոխադրումների առումով: Գաղտնիք չէ, որ, նախ, Ռուսաստան օդային ճանապարհով այցելելու համար Վրաստանից շատերն էին Երեւան հասնում, այդպիսով նպաստելով Երեւան-Մոսկվա չվերթերի ապահովմանը, թեեւ շատ այլ երկրներ ու քաղաքներ այցելությունը Թբիլիսիից շատ ավելի էժան կնստի ոչ միայն Վրաստանի, այլեւ Հայաստանի քաղաքացիների համար: Ու պատահական չէ, որ ներկա դրությամբ էլ գնի եւ բազմազանության առումով ամենագրավիչ տուրիստական առաջարկները հայաստանցիների համար ոչ թե Երեւանից են, այլ Թբիլիսիից:
Ռուսաստան-Վրաստան բանակցությունները, որ վարում են Վրաստանի վարչապետի հատուկ ներկայացուցիչ Զուրաբ Աբաշիձեն եւ ՌԴ ԱԳՆ պաշտոնական ներկայացուցիչ Ալեքսանդր Լուկաշեւիչը, հասել են մի հանգրվանի, երբ կողմերն արդեն քննարկում են ընդհատված տրանսպորտային հաղորդակցությունը վերականգնելու հարցը: Հետաքրքրական է, որ վրացի բանակցողը հարցը հենց այդպես էլ ներկայացրել է, թեեւ մանրամասնելիս անդրադարձել է միայն օդային հաղորդակցության խնդիրներին, սակայն բանակցության թեմա որպես ներկայացրել է ընդհանրապես տրանսպորտային հաղորդակցությունը:
Այդ մասին տեղեկացրել է նաեւ ռուսաստանյան կողմըՙ ներկայացնելով, որ շուտով երկու կողմերի համապատասխան գերատեսչությունների հանդիպումներ կլինենՙ քննարկելու «տրանսպորտային հաղորդակցության, ամենից առաջ` օդային հաղորդակցության վերականգնմանն առնչվող հարցեր»:
Ու թեեւ վրացական կողմը նաեւ հայտարարել է «առավել կարեւոր հարցերի դեռ չլուծված մնալու» մասին, ակնհայտ է, որ տարբեր ոլորտներում նորմալ հարաբերությունների վերականգնումը ներկա պահին չի կապվում Աբխազիայի եւ Հարավային Օսիայի խնդիրների հետ, միեւնույն ժամանակ, ինչպես Ռուսաստանի, այնպես էլ Վրաստանի համար առավել նպաստավոր պայմաններ են ապահովում հենց առեւտրային, հաղորդակցության ու այլ բնագավառներում գրանցվող փոփոխությունները:
