Հայաստանն այս տարի մասնակցել է Վենետիկի ժամանակակից արվեստի բիենալեին, որը կրում էր «Հանրագիտարանային պալատ» խորագիրը: Երեկ մշակույթի նախարարության ժամանակակից արվեստի վարչության պետ Սեյրանուհի Գեղամյանը լրագրողների հետ հանդիպմանը նշեց, որ Հայաստանի կողմից ներկայացված էր Արարատ Սարգսյանի «Տղա Դավթի եւ աղջիկ Խանդութի հեքիաթի պատումը», որը շաղկապում է ժամանակներն ու գեղարվեստական հին ու նոր արտահայտչամիջոցները. «Հայաստանի ներկայացրածն իր մթնոլորտով շատ համահունչ էր նախագծին – ամբողջովին իրականացավ դրված նպատակը»:
Ըստ Գեղամյանի, «Տղա Դավթի եւ աղջիկ Խանդութի հեքիաթի պատումը» ոչ միայն լիովին համապատասխանում է բիենալեի գլխավոր կոնցեպցիային, այլեւ այն տեղին էր այն միջավայրում, որտեղ ցուցադրվում էր` Սուրբ Ղազար կղզում, այնտեղ, որտեղ ի հայտ են եկել հայ բազմադարյան մշակույթի բազում նմուշներ, որոնցից է հայ առաջին տպագիր գիրքը:
Նախագծի համադրող Արման Գրիգորյանը նշում է, որ Սուրբ Ղազար կզզուց է սկսել հայկական մոդեռնիզմը, մինչդեռ այսօր ժամանակակից աշխարհում շատ են խոսակցությունները մոդեռնի ճգնաժամի մասին:
Վենետիկի բիենալեում Հայաստանը ներկայացնող նկարիչ Արարատ Սարգսյանն էլ իր հերթին ավելացրեց, որ կարեւոր է այս նախագիծը նաեւ իր սոցիալական իմաստով. «Բիենալեն սպորտ չէ, եւ այստեղ ամեն տարի ներկայանալը որպես երկիր, որպես մշակութային արժեք արդեն շատ կարեւոր է: Յուրաքանչյուր նկարչի համար ուրախություն է նման միջոցառմանը մասնակցելը»: Ինչպես ընդգծում է նկարիչը, շատ անվանի արվեստաբաններ տպավորված էին Հայաստանի մասնակցությունից:
«Տղա Դավթի եւ աղջիկ Խանդութի հեքիաթի պատում»-ի տեսահոլովակն անընդմեջ ցուցադրվել է բիենալեի հիմնական մեծ տաղավարներն ընդգրկող «Ջարդինի» եւ վետենիկյան Զինանոցի` Արսենալիի հսկայական համալիրի նախասրահներում, ինչպես նաեւ մշակութային եւ հասարակական նշանակության այլ կենտրոններում:
Վետենիկի ժամանակակից արվեստի բիենալեն աշխարհի խոշորագույն մշակութային միջոցառումներից է, որը հիմնադրվել է 1895 թվականին` որպես «Վետենիկի միջազգային գեղարվեստական ցուցահանդես»` ցուցադրելով 16 երկրի նկարիչների ստեղծագործություններ:
Հայաստանը բիենալեին մասնակցում է 1995 թվականից:
Ի դեպ, մասնակցության համար մշակույթի նախարարությունն այս տարի տրամադրել է 5 միլիոն դրամ:
