ՎԱՐՈՒԺԱՆ ՊՈՂՈՍՅԱՆ
Ադրբեջանը, պարզվում է, ըստ ԱՄՆ պետքարտուղար Ջոն Քերրիի, «տարբեր կրոնների, տարբեր կրոնական խմբավորումների միասին ապրելու կարողության դրսեւորման հրաշալի վիճակ է»: Այսպիսի հայտարարություն, որ ավելի շուտ կենաց է հիշեցնում, արել է ԱՄՆ պետքարտուղարը Ադրբեջանի արտգործնախարար Էլմար Մամեդյարովի հետ հանդիպումից առաջ` հունիսի 3-ին:
Պետքարտուղարության կայքէջի համաձայն, Քերրին նախ հիշեցրել է, որ վերջին ամիսներին քանիցս զրուցել է Ադրբեջանի նախագահ Ալիեւի հետ, տեղեկացնելով նաեւ, թե մինչեւ իրենց զրույցը Մամեդյարովը հանդիպել է Ամերիկյան հրեական հանձնաժողովին եւ «կանգնած ծափողջույնների արժանացել, երբ խոսել է հակասեմականության դեմ պայքարելու ու բազմազանության եւ բազմակարծության պատրաստակամության մասին»:
Որ Մամեդյարովը կարող է իր ու Ադրբեջանի գլուխը գովել, հասկանալի է, սակայն այնքան էլ հասկանալի չէ, անգամ դիվանագիտական բարեհաճության ու նրբանկատության պարագայում ԱՄՆ պետքարտուղարը կարող է ամենայն հանգստությամբ ներկայացնել Ադրբեջանի ԱԳ նախարարի խոսքերը բազմա… պատրաստակամության մասին, երբ մարդու իրավունքներին առնչվող գրեթե բոլոր զեկույցները հակառակն են պնդում:
«Ադրբեջանը կարեւոր գործընկեր է Աֆղանստանում… հավասարապես կարեւոր է հյուսիսային տեղաբաշխման ուղու, նաեւ հարավային գազամուղի եւ այլ հարցերի առումով, որ մեծագույն կարեւորություն ունեն մեզ համար», ասել է Քերրին:
Այդուհետեւ պետքարտուղարը կտրուկ անդրադարձ է կատարել ղարաբաղյան խնդրին: «Խոսել ենք նաեւ Լեռնային Ղարաբաղի մասին: Դա սառեցված հակամարտություն է, ինչպես մենք կոչում ենք, մի հակամարտություն, որ սպառնում է տարածաշրջանում կայունությանը, եւ ինչով մենք պետք է զբաղվենք», հասկանալի չէՙ ինչ համատեքստում նշել է Ջոն Քերրին մի տեսակ դիլետանտ ներկայանալով: Նրա խոսքերով. «Որպես Մինսկի խմբի համանախագահ ԱՄՆ-ը լուրջ հետաքրքրություն ունի օգնելու Ադրբեջանին եւ Հայաստանին` ի վիճակի լինելու գտնել առաջ տանող ուղին»:
«Ես կարծում եմ, որ առաջ գնալու ուղի կա, եւ մենք կշարունակենք աշխատել հանդարտորեն ու համբերատար խրախուսելով կողմերին կամ վստահության միջոցներ հիմնել եւ կարգավորման ուղի գտնել», Մամեդյարովին ջերմ ողջունող Քերրին այսպես է ձեւակերպել Միացյալ Նահանգների ներգրավվածությունը, հետաքրքրական շեշտադրում անելով. «Երկուսն էլ նախկինում մոտ էին, սակայն վերջին պահին ինչ-որ բաներ տեղի ունեցան, ինչը բոլորին զրկեց այդ հնարավորությունից»:
Վերջին արտահայտությունն, իհարկե, մեկ հասցեատեր ունի, որ այս ողջ խոսակցության ընթացքում կանգնած է եղել ԱՄՆ պետքարտուղարի կողքին, սակայն Քերրիի խոսքը մնացել է ընդհանուր ձեւակերպմամբ:
Այսքան, փաստացի, անտեղի ասվածին Մամեդյարովն էլ իր բաժինն է ավելացրել, թե Ադրբեջանը հարեւան Հայաստանի հետ «հաստատապես ուզում է ապրել խաղաղ` արժանապատվությամբ… դեպի պայծառ ապագան կնայենք ու կապրենք կողք կողքի որպես լավ հարեւաններ»:
Ռազմատենչ հռետորաբանությամբ արդեն բոլորին հոգնեցրած Ադրբեջանի թիվ մեկ դիվանագետը բնավ չի ամաչում ստել ի լուր աշխարհի, հետն էլ խոսել պայծառ ապագայից այն պարագայում, երբ Ադրբեջանում հայատյացությունն ու հակահայկականությունը պետական քաղաքականության ողջ էությունն են:
Ինչեւէ, երեկ նույն պետքարտուղարի հետ հանդիպել է նաեւ Հայաստանի արտգործնախարար Էդվարդ Նալբանդյանը, որի մասին դեռ կտեղեկացնենք: Նշենք միայն, որ Վաշինգտոնում նախատեսված էին նաեւ Նալբանդյանի հանդիպումները ԱՄՆ Կոնգրեսում, հանդիպումներ ամերիկահայ կազմակերպությունների ներկայացուցիչների հետ եւ ելույթը Ռազմավարական եւ միջազգային հետազոտությունների կենտրոնում:
