Ամենայն հավանականությամբ զորակոչի ընթացքով պայմանավորվածՙ ԼՂՀ շփման գծում, Քարվաճառի ուղղությամբ, հակառակորդը դիվերսիոն հարձակում է իրականացրել: «Ազգ»-ի տեղեկություններովՙ թշնամու 10-12 հոգանոց խմբի հետ բախումը տեղի է ունեցել բաց տարածքում: Բախումը տեւել է 10-15 րոպե, հայկական կողմը կարողացել է հետ շպրտել ադրբեջանական բանակի դիվերսանտներին: Ադրբեջանական կողմը զոհեր չի տվել, սակայն ունեցել է վիրավորներ: Մեր զինծառայողներից մի քանիսը մարմնական թեթեւ վնասվածքներ են ստացել. լուրջ վիրավորներ կամ զոհեր հայկական կողմը չի տվել:
ՀՀ ՊՆ մամուլի խոսնակ Արծրուն Հովհաննիսյանի փոխանցմամբՙ հակառակորդն այս օրերին իրեն դրսեւորել է նույն կերպ: «Սահմանին միշտ փորձում է առաջացնել նոր լարումներ, սակայն ստանում է արժանի հակահարված եւ հետ շպրտվում: Եղածի պատասխանատվությունը կրում է հակառակորդը: Զինված ուժերը լիովին վերահսկում են իրավիճակն ու ոչ մի կորուստ չեն ունեցել»:
