Հնդկաստանի Մումբայի քաղաքում անցկացվող շախմատի մրցաշարում 7 տուրից հետո հայ շախմատիստներից լավագույն արդյունքն ունի Դավիթ Պետրոսյանը, որը 5,5 միավորով 3-րդ տեղում է: Նա ընդամենը կես միավոր է զիջում աղյուսակը գլխավորող Միխեիլ Մչեդլիշվիլուն եւ Լեւան Պանցուլայային:
Պետրոսյանը մրցաշարը սկսեց 3 անընդմեջ հաղթանակովՙ առավելության հասնելով Գովինդ Յոշիի, Բաջաջ Պրինկեի եւ Վահե Բաղդասարյանի նկատմամբ: 4-րդ տուրում նա հաշտություն կնքեց Ֆարուխ Ամոնաթովի հետ, ապա հաղթեց Ռաջեշին: 6-րդ տուրում ուշադրության կենտրոնում էր վրացի Լեւան Պանցուլայայի հետ պարտիան, որում Դավիթը պարտվեց: Հաջորդ մրցախաղում հայ շախմատիստը հաղթեց Վադիմ Մալախատկոյին:
5-ական միավոր են վաստակել Լեւոն Բաբուջյանը, Զավեն Անդրեասյանը եւ Վահե Բաղդասարյանը: Գեւորգ Հարությունյանն ունի 4 միավոր, 3-ական միավոր են վաստակել Մարիա Գեւորգյանն ու Արմինե Բաբայանը:
