Մայիսի 27-29-ին Հայաստանի խորհրդարանական պատվիրակությունը մասնակցեց «Եվրոնեսթ» ԽՎ-ին: Երեկ մամուլի ասուլիսով հանդես եկան «Եվրոնեսթ» ԽՎ-ի հայկական պատվիրակության անդամները: Պատվիրակության ղեկավար Արտակ Զաքարյանի տեղեկացմամբՙ պատվիրակության անդամները քաղաքական հանձնաժողովում ներկայացրել են Արեւելյան գործընկերության անդամ երկրներում անվտանգության սպառնալիքներին նվիրված, էներգետիկ անվտանգության հանձնաժողովումՙ Արեւելյան գործընկերության տարածքում էներգետիկ համագործակցության եւ դեպի Եվրոմիություն էներգակիրների փոխանցման վերաբերյալ, քաղաքացիական հասարակության, սոցիալական հարցերի, կրթության եւ մշակույթի հարցերով հանձնաժողովումՙ աղքատության դեմ պայքարի եւ սոցիալական համահավասարեցմանն ուղղված, իսկ տնտեսական ինտեգրման հանձնաժողովումՙ ազգային օրենսդրությունների մոտարկման եւ տնտեսական ինտեգրման հեռանկարներին նվիրված զեկույցներ:
Պատվիրակության ղեկավարը նշեց, որ բոլոր չորս զեկույցների վերաբերյալ Ադրբեջանի, Վրաստանի եւ Եվրոպայի երկրների մի խումբ պատգամավորներ ներկայացրել էին առաջարկներ, որոնք հակասել են Հայաստանի շահերին: Արտակ Զաքարյանը տեղեկացրեց որ «Եվրոնեսթից» առաջ ԵԺԿ խմբակցության նիստի ժամանակ պայմանավորվածություն է ձեռք բերվել, ըստ որիՙ նրանք հետ են վերցրել իրենց առաջարկները:
Ըստ Արտակ Զաքարյանիՙ վերջին պահին ադրբեջանցիները քարտուղարության միջոցով օրակարգ են մտցրել «Հայաստանում ջրային ռեսուրսների սահմանափակման եւ դրանով Ադրբեջանի բնապահպանությանը սպառնալիք հանդիսացող» զեկույցի նախագիծ: Նշվեց, որ հայկական պատվիրակությունը դեմ է եղել այդ հարցը օրակարգ մտցնելուն եւ քննարկմանը, քանի որ Ադրբեջանն այս հարթակը եւս փորձում է օգտագործել հակահայկական քարոզչություն իրականացնելու համար: Ի վերջո հայկական պատվիրակությանը հաջողվել է հանել այն ինչպես քննարկման, այնպես էլ լիագումար նիստի օրակարգից:
Ի դեպ, նույն օրերին, մայիսի 29-ին Բրյուսելում, Եվրոխորհրդարանի շենքում տեղի ունեցավ «Հայոց ցեղասպանության ճանաչումը` հաշտեցման կամուրջ» կոնֆերանսը, որի մասին պատրաստած հաղորդագրության մեջ Բրյուսելից մեր թղթակիցը նշել էր, թե Հայաստանի պատվիրակությունը կոնֆերանսը սկսվելուց երկու րոպե հետո լքել է դահլիճը ( «Ազգ» , թիվ 89): Սրա վերաբերյալ «Ազգին» պարզաբանում տվեց «Եվրոնեսթ» խորհրդարանական վեհաժողովի պատվիրակ Մհեր Շահգելդյանը ՙ նշելով, թե նույն օրը տեղի էր ունենում «Եվրոնեսթի» վերջին պլենար նիստը` Ցեղասպանության նվիրված կոնֆերանսին զուգահեռ, ժամերը համընկնում էին. «Մենք մի քանի հոգով մասնակցում էինք ցեղասպանությանը վերաբերող քննարկումներին, որը սկսվեց մի կես ժամ-քառասուն րոպե ուշացումով: Այդ ժամանակահատվածում «Եվրոնեսթի» պլենար նիստում սկսվեցին քվեարկությունները, եւ հայկական պատվիրակությունը պետք է մասնակցեր քվեարկությանը: Մենք տեղեկացրինք` գնացինք, մասնակցեցինք քվեարկությանը եւ հետ եկանք, ու դա մի քառասուն րոպե տեւեց: Երբ վերադարձանք` քննարկումները շարունակվում էին, այդ ժամանակ ելույթ ունեցավ նաեւ Վալերի Բուայեն»: Ապա եւ կոնֆերանսում ելույթ են ունեցել Վահան Հովհաննիսյանն ու Մհեր Շահգելդյանը, որոնք ներկայացրել են հայկական տեսակետները հարցի վերաբերյալ, Մ. Շահգելդյանը Համաշխարհային հայկական կոնգրեսի մոտեցումներն է ներկայացրել: Այնպես որ Բրյուսելից հաղորդագրության` հայկական պատվիրակության դալիճը լքելու մասին ձեւակերպումը իր տեղում չէ` վերեւի պարզաբանման պատճառով:
