Վ. Ա.
Ադրբեջանի ԿԸՀ-ն հրապարակել է այդ երկրի ընտրողների ընդհանուր թիվըՙ 4 մլն 967 հազար: Պետական վիճակագրական ծառայության տվյալներով, սակայն, Ադրբեջանի բնակչությունը 9 մլն 467 հազար է, որի 60 տոկոսի տարիքը 20-ից բարձր է: Ըստ haqqin.az-ի, ԿԸՀ եւ պետական վիճակագրության տվյալների տարբերությունը կազմում է «ավելի քան 1,5 մլն»:
Եթե ճիշտ է ԿԸՀ-ի հրապարակած թիվը, ուրեմն Ադրբեջանի բնակչությունը չի գերազանցում 6 մլն-ը, իսկ եթե պետական վիճակագրական ծառայությունն է ճիշտ, ապա ո՞ւր են կորել ավելի քան 1,5 մլն ընտրողները: Haqqin.az-ը գտնում է, որ ընտրատարածքային հանձնաժողովները «ընտրողների իրական թվաքանակը ճշտելու ուղղությամբ ոչինչ չեն անում, միայն վերցնում եւ իրենց ցուցակներում կրկնում են գործադիր իշխանության մարմիններից ստացված տվյալները»:
Կարելի է ենթադրել, որ Ադրբեջանի ԿԸՀ-ի տվյալներն ավելի մոտ են իրականությանը, իսկ պետական վիճակագրական ծառայությունը պարզապես «լայն քայլերով է ընթանում Ադրբեջանը» բրեժնեւյան ժամանակների կարգախոսով է ղեկավարվումՙ տպավորություն ստեղծելու, թե որքան «բուռն է զարգացումը» Իլհամ Ալիեւի «թագավորությունում»:
Բայց թե ինչո՞ւ «նորին բռնապետական մեծությունը» վերջին պահին հրահանգել է, որ ԿԸՀ-ն հիմք ընդունի բնակչության իրական թվաքանակը, մնում է գաղտնիք: Գուցե նրան «վերընտրվելու» համար հատկապես ԿԸՀ-ի կողմից ճշգրտված ցուցակներում ընդգրկված ընտրողնե՞րն են միայն պետք:
