Հանրային ծառայությունները կարգավորող հանձնաժողովի երեկվա նիստը տեղի չունեցավ: Հանձնաժողովի նախագահ Ռոբերտ Նազարյանը հայտարարեց, որ նիստի անցկացման մասին լրացուցիչ կտեղեկացվի: Մինչ այդ հանձնաժողովի շենքի առջեւ գազի գնի բարձրացման դեմ բողոքում էին տարբեր հասարակական կազմակերպությունների ներկայացուցիչները, որոնք գրանցվելուց հետո պետք է մասնակցեին քննարկումներին: Սակայն խնդիր առաջացավ դահլիճի փոքր լինելու պատճառով: Հանձնաժողովի նախագահն առաջարկեց տեղափոխվել ավելի մեծ դահլիճ, որին հասարակական կազմակերպությունների ներկայացուցիչները չհամաձայնեցին, պահանջելով շատ ավելի մեծ դահլիճում կազմակերպել քննարկումը: Դրան Ռոբերտ Նազարյանը դեմ արտահայտվեց, ասելով, որ ինքը չի ցանկանում շոուի մասնակից լինել եւ 3 մլն մարդու կարծիք չի կարող լսել: Սա գազի գնի դեմ բողոքողների դժգոհությունն առաջացրեց: Արդյունքում հանձնաժողովը դուրս եկավ դահլիճից եւ նիստը չկայացավ:
Տեղեկացնենք, որ համաձայն հանձնաժողովի պատրաստած որոշումների նախագծերի, 1 խմ գազի գինը պետք է կազմեր 156 դրամ, իսկ 1 կվտ/ժ էլեկտրաէներգիայի գինը բնակչության համար` 38 դրամ ցերեկային սակագինը, 28 դրամՙ գիշերային սակագինը:
Փոփոխություն էր առաջարկվում նաեւ էլեկտրաէներգիայի ցերեկային եւ գիշերային սակագների ժամերի հետ կապված: Հոկտեմբերի վերջից մինչեւ մարտի վերջը գիշերային սակագինը պետք է գործի գիշերվա ժամը 23-ից մինչեւ առավոտյան ժամը 7-ը, իսկ մարտի վերջից մինչեւ հոկտեմբերի վերջը` գիշերվա ժամը 22-ից մինչեւ առավոտյան ժամը 6-ը:
