Հանրապետության 47 հասցեում գտնվող եռահարկ շենքն այսուհետ իշխող «Քաղաքացիական պայմանագիր» կուսակցությանը կծառայի: Կառավարության՝ 2022-ի հոկտեմբերի 13-ի որոշմամբ՝ Երեւանի սրտում գտնվող շենքը, որտեղ նախկինում նաեւ «Ազգ» շաբաթաթերթի խմբագրությունն էր, ՔՊ-ն վարձակալել՝ 4 մլն դրամով:
Բացի «Ազգ» թեթի խմբագրությունն՝ այստեղ նաեւ «Բարգավաճ Հայաստան» կուսակցության գրասենյակն էր գտնվում, բայց թե՛ ԲՀԿ-ն, թե՛ «Ազգ»-ը 2018-ի քաղաքական վերադասավորումներից հետո, աճուրդում նշանակված մեկնարկային մեծ գնից հետո ստիպվել էին լքել տարածքն, ու շենքը տեւական ժամանակ թափուր էր մնացել:
Այժմ, փաստորեն, իշխանությունները ձեռքները կենտրոնում գտնվող այս շենքի վրա են դրել ու որոշել իշխող նախկին ուժի՝ ՀՀԿ-ի, ու վերջինիս հետ կոալիցիոն կառավարություն կազմած ՀՅԴ-ի հետ հարեւանություն անել: Նկատենք, որ Հանրապետության փողոցում է գտնվում նաեւ ՀՅԴ գերագույն մարմնի գրասենյակը: Դե իսկ Հանրապետականի կենտրոնակայանը ՔՊ-ի ապագա գրասենյակի հետնամասում է՝ Մելիք-Ադամյան փողոցի կողմից: Հիշեցնենք, որ թե՛ «Ազգ»ը, թե՛ «Բարգավաճը» մեծ գումարներով հիմնանորոգել էին շենքի իրենց մասնաբաժինները:
ՍԵՎԱԿ ՎԱՐԴՈՒՄՅԱՆ
