Փոքր Վեդին գտնվում է Հայաստանի Հանրապետության Արարատի մարզի Արարատի տարածաշրջանում, Բիբլիական Արարատի ներքո, Արաքս գետի ձախ ափին, Երեւանից 28 կմ հարավ-արեւելք, մարզկենտրոնից հեռու է 10 կմ: Ծովի մակերեւույթից բարձր է 820 մ:
Գյուղը հիմնադրվել է 1831 թվականին: Գյուղի նախկին անվանումը եղել է Քիչիկ Վեդի: Վեդին արաբերեն բառ է, որը նշանակում է ձոր, հետագայում՝ թարգմանելով արաբերենից հայերեն՝ գյուղը կոչվել է Փոքր Վեդի: 2011թ. տվյալներով Փոքր Վեդին ունի 2772 բնակիչ:
Փոքր Վեդին Արարատի մարզի Վեդի խոշորացված համայնքի 19 բնակավայրերից մեկն է, որը գտնվում է զբոսաշրջային ակտիվ երթուղու՝ Խոր Վիրապ տանող միջպետական մայրուղու վրա: Տարիներ շարունակ գյուղ մտնող ճանապարհը մթնշաղից հետո հայտնվել է խավարում: Իսկ բնակավայրում եղած լուսավորության հին համակարգը գործել է գազային ու շիկացման լամպերով, եղել ոչ արդյունավետ ու շատ ծախսատար: Համայնքը մեծ գումարներ է ներդրել լամպերը փոխելու համար: Նոր տեխնոլոգիաների ներդրման շնորհիվ Փոքր Վեդիում խնդիրն արդեն լուծվել է: Տարեկան կտնտեսվի շուրջ մեկ միլիոն դրամ: Վիվա-ՄՏՍ-ն ու Վայրի բնության եւ մշակութային արժեքների պահպանման հիմնադրամը (FPWC) ենթակառուցվածքների արդիականացման ծրագիր են իրականացրել այս գյուղում:
Փոքր Վեդիում արտաքին լուսավորության արդիականացված համակարգի համար տեղակայվել են 100 Վատտ հզորությամբ էներգախնայող ԼԵԴ լուսարձակներ: Լուսավորվել է շուրջ 2 կմ ճանապարհ՝ գյուղի գլխավոր փողոցն ու գյուղ մտնող հատվածը: Չորս հենասյան վրա տեղադրվել են լուսարձակներ:
ՍՏԵՓԱՆ ՊԱՊԻԿՅԱՆ
Ռուսաստանի բնագիտության ակադեմիայի պրոֆեսոր
