Լոս Անջելեսի Կալիֆոռնիա համալսարանի (UCLA) «The Promise» (Խոստում) հայագիտական ինստիտուտի (հիմնված 2022-ին) ցեղասպանության հետազոտությունների ծրագիրը, Լոյոլա Մերիմաունտ համալսարանի իրավաբանական ֆակուլտետի իրավունքի եւ ցեղասպանության ուսումնասիրության կենտրոնը, ինչպես նաեւ Հայագիտական ուսումնասիրությունների եւ հետազոտությունների ազգային «ՆԱԱՍՐ» ընկերակցությունը նախաձեռնել են UCLA-ի «Մոնգ» ուսումնական կենտրոնում մարտի 25-ին անցկացնել գիտաժողով՝ նվիրված Հայոց ցեղասպանության օրերին թալանված գույքի փոխհատուցմանը: Պատմական այս առաջին գիտաժողովը տեղի է ունենալու «Մ. Նահանգների կողմից ցեղասպանության ճանաչումից հետո ո՞րն է հաջորդ քայլը» խորագրի ներքո:
«Եթե յուրաքանչյուր ցեղասպանություն ունի իր սեփական առաձնահատկությունները եւ ապագա ճակատագիրը, ապա Հայոց ցեղասպանության պարագայում դա եղել է երկարամյա ժխտումը կամ ուրացումը Թուրքիայի իրարահաջորդ կառավարությունների կողմից: Աշխարհասփյուռ հայության համար խիստ կարեւոր է եղել Առաջին համաշխարհային պատերազմի օրերին կրած աղետը կոչել իր իսկական անունով՝ Ցեղասպանություն բառով», նշել է այդ առթիվ «Promise»ի Ծրագրի տնօրեն Թաներ Աքչամը՝ ավելացնելով. «Այդ օրը մենք փորձելու ենք գտնել հետեւյալ հարցերի պատասխանը. «ի՞նչ հնարավորություններ կան ստեղծելու փոխհատուցում պահանջելու մի շարժում 2021-ին Բայդենի եւ Կոնգրեսի ընդունած ճանաչումից հետո: Դրա համար ինչպիսի՞ հնարավորություններ է ընձեռում մեզ Ամերիկայի օրենսդրական համակարգը: Կարո՞ղ է արդյոք հրեական «Հոլոքոսթի» փոխհատուցման շարժումը օրինակ ծառայել հայերին», եւայլն»:
Գիտաժողովի առաջին մասում խոսք է առնելու ԵՄ-ում Ամերիկայի նախկին (1993-96) դեսպան, այժմ պետքարտուղար Բլինքենի Հոլոքոսթի հարցերով հատուկ խորհրդական Սթյուարտ Էյզենշտատը, որ ներկայացնելու է Հոլոքոսթի փոխհատուցման շարժմանն առնչվող իր փորձառությունը: Այնուհետեւ քննարկվելու են թալանված գույքի վերաբերյալ անցյալի դատավճիռներն ու ներկայի իրավական դաշտի հնարավորությունները:
Գիտաժողովին, որի հովանավորողներն են «Promise» ինստիտուտը (UCLA), հայկական փաստաբանական ընկերակցությունը եւ Արարատ-Էսքիճյան թանգարանը, կարելի է մասնակցել առցանց՝ այցելելով bit.ly/whatsnext 03-25-23 կայքը:
Տեղեկությունը՝ «Միրոր-Սփեքթեյթր» շաբաթաթերթից:
Հ.Ծ.
