Թեհրանում 3+3 ձեւաչափով հանդիպման առաջարկություն
Հայաստանի Հանրապետության Անվտանգության խորհրդի քարտուղար Արմեն Գրիգորյանը մարտի 22-ին ընդունել է ՀՀ ԱԳ նախարարի տեղակալ Վահան Կոստանյանի հրավերով Երեւան ժամանած Իրանի Իսլամական Հանրապետության փոխարտգործնախարար Ալի Բաղերի Քանիին:
ՀՀ Անվտանգության խորհրդի տարածած հաղորդագրության համաձայն, հանդիպմանը կողմերն ընդգծել են երկու երկրների միջեւ տարբեր ոլորտներում համագործակցության կայուն զարգացման միտումը: Կարեւորվել է տարածաշրջանային անվտանգությունը, կայունությունն ու խաղաղության ապահովումը:
ՀՀ Անվտանգության խորհրդի քարտուղարը ներկայացրել է հայ-ադրբեջանական սահմանին եւ Լեռնային Ղարաբաղի շուրջ տիրող իրավիճակը: Քննարկվել են տարածաշրջանում սպառնալիք ներկայացնող անվտանգության այլ հարցեր:
Իրանական կողմի փոխանցած տեղեկատվության համաձայն, որն արտացոլվել է IRANIAN DIPLOMACY էլեկտրոնային կայքի հարթակում, ՀՀ Անվտանգության խորհրդի քարտուղար Արմեն Գրիգորյանի հետ հանդիպմանը, ԻԻՀ ԱԳ փոխնախարար Բաղերի Քանին ներկայացրել է միջազգայնորեն ընդունված սահմանների անձեռնմխելիության մասին Իրանի սկզբունքային դիրքորոշումն ու կարեւորել տարածաշրջանի երկրների մասնակցությամբ խաղաղության ու կայունության հաստատումը, հավելելով, որ Իրանի Իսլամական Հանրապետությունը պատրաստ է մոտ ապագայում, արտաքին գործերի նախարարների մակարդակով, 3+3 (Իրան, Հայաստան, Ադրբեջան, Վրաստան, Թուրքիա, Ռուսաստան) ձեւաչափով հանդիպում կազմակերպել Թեհրանում:
Ըստ իրանական կայքի, Հայաստանի Անվտանգության խորհրդի քարտուղարը, բարձր գնահատելով տարածաշրջանային կայունության հաստատմանը միտված իրանական կողմի նախաձեռնությունները, ողջունելի է համարել 3+3 ձեւաչափով հանդիպումը Թեհրանում անցկացնելու առաջարկը:
Գ.Ա.
